Qaıtarylǵan aktıvter: Aral aýdanynda sýmen jabdyqtaý júıesin salýǵa 4,2 mlrd teńge bólindi
ASTANA. KAZINFORM — Qaıtarylǵan aktıvterdiń 4 mlrd teńgeden astamy Qyzylorda oblysyndaǵy sýmen jabdyqtaý júıeleriniń qurylysyn aıaqtaýǵa bólindi. Bul týraly Úkimettiń baspasóz qyzmeti habarlady.
Memleket basshysynyń tapsyrmasyna sáıkes Úkimet elge qaıtarylǵan zańsyz shyǵarylǵan aktıvter esebinen áleýmettik mańyzdy ınfraqurylym salý jónindegi jobalardy iske asyryp jatyr.
— Qyzylorda oblysynyń Aral aýdanynda sýmen jabdyqtaý júıesin salýǵa jáne jańǵyrtýǵa Arnaýly memlekettik qordan shamamen 4,2 mlrd teńge bólý týraly sheshim qabyldandy, — delingen habarlamada.
3 myńnan astam halqy bar Toqabaı jáne Abaı aýyldaryn ortalyqtandyrylǵan aýyz sýmen qamtamasyz etý maqsatynda Aral–Sarybulaq toptyq sý qubyryna qosylatyn Aral–Toqabaı–Abaı magıstrali tarmaǵynyń qurylysy júrgizilýde. Jobanyń iske asyrylýy 2021 jyly bastalǵan. Ony aıaqtaý úshin qosymsha 3,7 mlrd teńge qajet. Qarjy bólý týraly sheshim qabyldandy. Nysandy 2025 jyldyń sońyna deıin paıdalanýǵa berý josparlanyp otyr.
Shamamen 400 turǵyny bar Aqbasty aýylynda Aral–Sarybulaq toptyq sý qubyryna qosylatyn Qosman–Aqbasty magıstrali tarmaǵynyń qurylysy aıaqtalýǵa jaqyn. Jobanyń quny — shamamen 2,4 mlrd teńge, onyń 1,8 mlrd teńgesi ıgerilgen. Qalǵan 524 mln teńgesi Arnaýly memlekettik qordan bólindi. Nysandy bıyl iske qosý josparlanyp otyr.
Osy jobalardy iske asyrý sapaly sýǵa tikeleı qol jetkizýdi qamtamasyz ete otyryp, jańa ekonomıkalyq múmkindikterge jol ashady, aýyl turǵyndarynyń turmys sapasyn edáýir jaqsartýǵa jaǵdaı týǵyzady.
Sýmen jabdyqtaý júıesin salý jáne jańǵyrtý Úkimet jumysynyń mańyzdy basym mindetteriniń biri bolyp sanalatynyn atap ótý qajet. Іs-sharalar Memleket basshysynyń qalalar men aýyldardy aýyz sýmen 100% qamtý jónindegi tapsyrmasyn oryndaý sheńberinde júrgizilýde.
Aıta ketelik Ulytaýda jańa mektep salý úshin qaıtarylǵan aktıvterden 1,4 mlrd teńge bólingen edi.