Qaıtarylǵan aktıvter: 5,5 mlrd teńge BQO-daǵy aýyldardy sýmen jabdyqtaýǵa baǵyttaldy

ASTANA. KAZINFORM - Memleket basshysynyń áleýmettik mańyzy bar ınfraqurylymdy damytý jónindegi tapsyrmalaryn oryndaý sheńberinde Arnaýly memlekettik qordan Batys Qazaqstan oblysynda sýmen jabdyqtaý júıelerin salý jáne rekonstrýktsııalaý boıynsha 11 jobany júzege asyrýǵa 5,5 mlrd teńge bólindi.

Úkimettiń dereginshe, 4,3 mlrd teńge kólemindegi qarjylandyrýdyń negizgi somasy 9 nysanǵa bólinetin bolady. 

1,8 mlrd teńge 1,7 myńnan astam turǵyny bar Qaratóbe aýdanynyń Tólen, Sáýle jáne Qaraqamys eldi mekenderine jańa tarmaq salý arqyly sýmen jabdyqtaýdyń magıstraldy júıelerin salýǵa, 2,5 mlrd teńge Terekti, Qaratóbe aýdandarynyń 8 aýylynda, sondaı-aq Báıterek aýdanynda sýmen jabdyqtaý jelilerin salýǵa baǵyttaldy.

- Sondaı-aq buryn Báıterek aýdany Kırsanov aýylynyń turǵyndaryn sýmen qamtamasyz etýge jáne Jánibek aýdanyndaǵy Orda toptyq sý qubyryn qaıta jańartýǵa 1,2 mlrd teńge baǵyttalady. Búgingi tańda jumys 60% oryndaldy, - delingen aqparatta.

Atalǵan jumys Memleket basshysynyń halyqty sapaly aýyz sýmen 100% qamtamasyz etý jónindegi tapsyrmasyn júzege asyrýǵa baǵyttalǵan. Ónerkásip jáne qurylys mınıstrliginiń derekteri boıynsha Batys Qazaqstan oblysyndaǵy aǵymdaǵy qoljetimdilik deńgeıi qalalarda 100%-dy, al aýyldyq eldi mekenderde 97%-dy quraıdy.

Búgingi tańda Arnaýly memlekettik qordan 400-den astam áleýmettik mańyzy bar jobany salýǵa 375 mlrd teńge baǵyttaldy. Mektepter, aýrýhanalar, sport keshenderi, sýmen jabdyqtaý nysandary jáne basqa da nysandar salynýda. Qazirdiń ózinde 44 nysan aıaqtalyp, el ıgiligine berildi.

Aıta keteıik, Almatyda qaıtarylǵan aktıvter esebinen 10 shaqyrym sý men káriz júrgizildi.