Qaıtarylǵan aktıv: Rıdderde aýrýhana salynady
ASTANA. KAZINFORM - Memleket basshysynyń tapsyrmasymen «Zańsyz ıemdenilgen aktıvterdi memleketke qaıtarý týraly» Zań sheńberinde qaıtarylǵan qarajattan Rıdder qalasyndaǵy 200 oryndyq statsıonary men bir aýysymda 500 adamdy qabyldaı alatyn emhanasy bar kópsalaly aýrýhana kesheniniń qurylysyn aıaqtaýǵa 28,2 mlrd teńge bólindi. Bul týraly Úkimettiń baspasóz qyzmeti habarlaıdy.
Úkimet 2021 jyly bastalǵan aýrýhana kesheniniń qurylysyn aıaqtaý úshin qarajat bólý týraly sheshim qabyldady. Jobanyń jalpy quny – 34,8 mlrd teńge, qazirgi ýaqytta 6,6 mlrd teńge ıgerildi, onyń ishinde 2 mlrd teńge respýblıkalyq bıýdjetten, 4,6 mlrd teńge jergilikti bıýdjetten bólingen. Qalǵan qarajat Arnaýly memlekettik qordan bólinedi.
Buǵan deıin Shyǵys Qazaqstan oblysyna jumys sapary barysynda Premer-Mınıstr Oljas Bektenovke qurylys alańyn qaraý kezinde jumysty aıaqtaý úshin jobany qarjylandyrý qajettiligi týraly baıandalǵan bolatyn. Qabyldanǵan sharalar áleýmettik mańyzy bar obektiniń «saqaldy qurylys» tizimine enýine jol bermeýge jáne turǵyndardy sapaly jáne qoljetimdi medıtsınalyq qyzmettermen qamtamasyz etýge múmkindik beredi.
Aýrýhana kesheniniń ashylýy demografııalyq júktemesi joǵary monoqala úshin óte mańyzdy. Rıdderdiń halqy 55 myń adamdy quraıdy, onyń 22,7%-y 60 jastan asqan. Qalanyń ár túkpirindegi 12 ǵımaratta ornalasqan jalǵyz aýrýhana kesheniniń ǵımarattary 80 jyldan astam ýaqyt buryn salynǵan. Nysandar eskirgen jáne qazirgi zamanǵy talaptarǵa sáıkes kelmeıdi. Sonymen qatar halyqqa shuǵyl medıtsınalyq kómek kórsetý úshin qosymsha kardıologııalyq, ınsýlttik, travmatologııalyq jáne kúıik tósekterin ashý qajet.
Jańa kópsalaly keshenniń jalpy aýdany – 40 myń m2. Aýrýhana saraptamalyq klastaǵy medıtsınalyq jabdyqtarmen jabdyqtalady. Munda 500-den astam qyzmetker jumys isteıtin bolady.
Buǵan deıin qarajat Aqtóbe qalasynda erekshe qajettilikteri bar balalarǵa arnalǵan arnaıy balabaqsha, Aqmola oblysy Zerendi aýylynda sport kesheni, Túrkistan oblysy Temirlan aýylynda mýzyka mektebi, Arqalyq qalasynda daryndy sportshy balalarǵa arnalǵan sport kesheni, Astanada tirek-qımyl apparaty buzylǵan balalarǵa arnalǵan ońaltý ortalyǵy, Almatyda erekshe qajettilikteri bar adamdarǵa arnalǵan jattyǵý ortalyǵy qurylysyna baǵyttalǵan bolatyn.
Osy baǵyttaǵy jumystar ári qaraı da jalǵasýda.