Qaıtarylǵan aktıv. Aqtaýda jedel medıtsınalyq járdem stansasy salynady

ASTANA. KAZINFORM — Úkimet Aqtaýda oblystyq jedel medıtsınalyq járdem stansasynyń qurylysyn qarjylandyrýǵa 4,6 mlrd teńge bóldi.

Prezıdenttiń tapsyrmasyn oryndaý aıasynda qaıtarylǵan aktıvter esebinen áleýmettik mańyzy bar jobalardy iske asyrý maqsatynda Aqtaýda jylyna 100 myń shaqyrtýǵa qyzmet kórsetýge qaýqarly oblystyq jedel jáne shuǵyl medıtsınalyq járdem stansasy salynady.

— Bul maqsatqa Úkimet Arnaýly memlekettik qordan 4,6 mlrd teńge bóldi. Nysannyń qurylysy Aqtaý qalasynyń 34A shaǵyn aýdanynda ornalasqan 2,6 gektar jer ýchaskesinde josparlanǵan. Jedel jáne shuǵyl medıtsınalyq járdem stansasynyń quramyna oqý-sımýlıatsııalyq ortalyq, sanıtarlyq kólikterge arnalǵan jóndeý jáne jýý bazasy enedi. Jobanyń jalpy quny 4,8 mlrd teńge dep baǵalanǵan. Onyń 100 mln teńgesi jergilikti bıýdjetten bólingen, — delingen habarlamada.

Qazirgi tańda nysannyń daıyndyq deńgeıi 10%-dy quraıdy: jer qazý jumystary aıaqtalyp, ishki ınjenerlik jelilerdiń qurylysy júrgizildi. Arnaýly memlekettik qordan bólingen qarajat jobany belgilengen kestege sáıkes tolyq aıaqtaýǵa múmkindik beredi.

Búginde Aqtaýda 200 myńǵa jýyq adam turady. Aımaq bala týý kórsetkishi boıynsha kósh bastap tur. Sońǵy 7 jyl ishinde qalada 10 jańa shaǵyn aýdan salyndy. Jańa jedel járdem stansasynyń qurylysy halyqty qoljetimdi ári sapaly medıtsınalyq kómekpen qamtamasyz etýge múmkindik beredi.

Qazirgi tańda Úkimet Arnaýly memlekettik qordan áleýmettik mańyzy bar nysandardyń qurylysyna shamamen 55,2 mlrd teńge bóldi. Olardyń qatarynda 4 mektep, onyń bireýi 1 mýzykalyq mektep, 2 sport kesheni, kópsalaly aýrýhana kesheni, jataqhana jáne 2 balabaqsha bar.

Sondaı-aq «Zańsyz ıemdenilgen aktıvterdi memleketke qaıtarý týraly» Zańǵa sáıkes sýbektilerdiń qarajaty esebinen Arqalyq, Astana jáne Almaty qalalarynda birqatar áleýmettik ınfraqurylym nysandary salynýda. Jumys jalǵasyp jatyr. 

Buǵan deıin Almaty oblysynda qaıtarylǵan aktıvter esebinen jańa sport kesheni salynatyny aıtyldy.