«Qaıtalaýǵa tyryspańyz»: Qazaqstandyq fýtbolshynyń trıýgi álemdegi tanymal pablıkte jarııalandy

ASTANA. QazAqparat – Fýtbol týraly álemdegi eń tanymal pablık qazaqstandyq sportshynyń trıýk jasaǵan vıdeosyn jarııalady, dep habarlaıdy QazAqparat Meta-ratings.kz-ke silteme jasap.

Instagram-daǵy @433 pablıgine 64,4 mln adam jazylǵan.

Qazaqstandyq fýtbolshy Álisher Kelgenbaı match barysynda gol soqqannan keıin, qýanyshtan qaqpanyń beltemirine shyǵyp, artqa qaraı salto jasaıdy. Oıyn Almatyda medııalyq fýtbol lıgasy aıasynda ótken.

Vıdeo @433 pablıginde jarııalanyp, tusyna: «Úı jaǵdaıynda qaıtalaýǵa tyryspańyz», - dep jazylǵan.

Qazirgi ýaqytta vıdeo 2,8 mln astam qaralym jınap, oǵan 230 myńǵa jýyq laık basylǵan.