Qaıta jasaqtalǵan Ónerkásip jáne qurylys mınıstrligine qandaı uıymdar qaraıdy

ASTANA. QazAqparat – Jańadan qurylǵan Ónerkásip jáne qurylys mınıstrliginiń qyzmet baǵyty men erejelerin bekitýdi kózdeıtin Úkimet qaýlysy ashyq talqyǵa shyǵaryldy, dep habarlaıdy QazAqparat tilshisi.

Ashyq NQA portalynda jarııalaǵan qaýly jobasynda jazylǵandaı, mınıstrliktiń quramyna myna komıtetter kiredi:

1. Ónerkásip komıteti;

2. Qurylys jáne turǵyn úı-kommýnaldyq sharýashylyq isteri komıteti;

3. Memlekettik qorǵanystyq tapsyrys komıteti;

4. Geologııa komıteti.

Buǵan qosa, qaýly jobasynda Ónerkásip jáne qurylys mınıstrliginiń qyzmet baǵyttary aıqyndalǵan:

- ónerkásipti damytý;

- taý-ken metallýrgııa keshenin damytý;

- mashına jasaý, kómir, hımııa buıymdary, aǵash óńdeý jáne jıhaz ónerkásibin qoldaý;

- qurylys ındýstrııasy jáne qurylys materıaldaryn óndirý;

- mashınalar men jabdyqtardyń qaýipsizdigi qamtamasyz etý;

- energııa únemdeý jáne energııa tıimdiligin arttyrý;

- baǵaly metaldar óndirisi jáne asyl tastardyń aınalymyn qadaǵalaý;

- arnaıy ekonomıkalyq aımaqtardy qurý;

- ýran óndirýdi qospaǵanda, qatty paıdaly qazbalar bóliginde jer qoınaýyn paıdalanýǵa memlekettik basqarý júrgizý;

- eldi mekender sheginde sýmen jabdyqtaý jáne sý burý, jylýmen jabdyqta;

- turǵyn úı qurylysyna úlestik qatysý;

- qorǵanys ónerkásibi salalarynda memlekettik saıasatty qalyptastyrý jáne iske asyrý.

Mınıstrlik jáne oǵan baǵynysty vedomstvolar qaramaǵyna myna uıymdar kiredi:

- «QazIndustry» qazaqstandyq ındýstrııa jáne eksport ortalyǵy» AQ;

- «Qazaqstan ınjınırıng» ulttyq kompanııasy» AQ;

- «Taraz hımııalyq parki» arnaıy ekonomıkalyq aımaǵynyń basqarýshy kompanııasy» AQ;

- QR mıneraldyq shıkizatty keshendi qaıta óńdeý jónindegi ulttyq ortalyǵy;

- Ulttyq tehnologııalyq boljaý ortalyǵy;

- «Elektr energetıkasyn damytý jáne energııa únemdeý ınstıtýty» AQ;

- «Jobalardy memlekettik vedomstvodan tys saraptaý» RMK;

- Respýblıkalyq memlekettik qala qurylysyn josparlaý jáne kadastr ortalyǵy;

- «Qazaq ǵylymı-zertteý jáne qurylys pen sáýlet jobalaý ınstıtýty» AQ;

- «Qazarnaýlyeksport» RMK;

- «Ulttyq geologııalyq qyzmet» AQ.

Úkimet qaýlysynyń jobasy 20 qyrkúıekke deıin kópshilik talqysynda bolady. Keıin qol qoıý úshin Premer-Mınıstrge joldanady.

Aıta keteıik, 4 qyrkúıekte Qanat Sharlapaev qaıta jasaqtalǵan Ónerkásip jáne qurylys mınıstrliginiń basshysy bolyp taǵaıyndaldy.

Qosa ketsek, 1 qyrkúıekte Memleket basshysynyń Jarlyǵymen elimizde 5 jańa mınıstrlik quryldy.