Qaıta jańǵyrtylǵan eki temirjol vokzaly elimizde alǵash ret Abaı oblysynda paıdalanýǵa berildi
SEMEI. KAZINFORM - Memleket basshysy Qasym-Jomart Toqaevtyń tapsyrmasyna sáıkes «Qazaqstan temir joly» ulttyq kompanııasynyń vokzal ınfraqurylymyn jańǵyrtý baǵdarlamasy aıasynda respýblıka boıynsha 124 vokzaldy jańǵyrtý jumysy bastalǵan bolatyn.
Búgin Borodýlıha aýdanynyń Aýyl jáne Belaǵash aýyldaryndaǵy temirjol vokzaldary qaıta jańǵyrtýdan keıin elimizde alǵash bolyp paıdalanýǵa berildi.
Ashylý rásimine oblys ákimi Berik Ýálı, Qazaqstan Respýblıkasy Kólik vıtse-mınıstri Jánibek Taıjanov, «Qazaqstan temir joly» UK» AQ qurylys jónindegi basqarýshy dırektory Marat Isqalıev qatysty.
Aýyl stantsııasynda 600-den astam turǵyn bar. Mundaǵy temirjol vokzaly 1929 jyly salynǵan. Sońǵy ret 2011 jyly kúrdeli jóndeýden ótken. Aýyl stantsııasy óńirdiń kólik júıesinde mańyzdy oryn alady. Stantsııa arqyly halyqaralyq baǵyttaǵy «Novosıbırsk – Almaty» poıyzy qatynaıdy. Belaǵash aýylynda 900-den astam halyq turady.
Eldi mekendegi temirjol vokzaly 1914 jyly boı kótergen. Ǵımaratqa sońǵy ret 2013 jyly kúrdeli jóndeý júrgizilgen.
Rekonstrýktsııa barysynda Aýyl stantsııasyndaǵy temirjol vokzaly ǵımaratynyń aýmaǵy 240,9 sharshy metrden 272,89 sharshy metrge, Belaǵash temirjol vokzaly aýmaǵy 208 sharshy metrden 264,55 sharshy metrge deıin keńeıtildi. Eki nysanda da shatyr tolyq aýystyrylyp, ishki jáne syrtqy árleý jumystary júrgizildi. Sý, káriz, jylý, elektrmen jabdyqtaý, jeldetý jáne kondıtsıonerleý júıeleri jańartyldy. Perrondar qaıta jóndelip, irgeles aýmaqtar abattandyryldy. Vokzaldar jańa jıhazdarmen jáne qajetti jabdyqtarmen qamtamasyz etildi.
Sondaı-aq, múmkindigi shekteýli azamattarǵa, qart adamdar men kishkentaı balalary bar analarǵa qolaıly jaǵdaı jasaýǵa erekshe kóńil bólindi. Ǵımarattarda arnaıy sanıtarlyq toraptar, ana men bala bólmeleri, pandýstar men taktıldi baǵyttaýshy elementter qarastyrylǵan.
Aımaq basshysy qaıta jańǵyrtylǵan vokzaldardyń eldi meken turǵyndary úshin mańyzy zor ekenin atap ótti.
-Memleket basshysy elimizdiń kólik-logıstıka áleýetin arttyrý, temirjol ınfraqurylymyn jańǵyrtý jáne halyqqa kórsetiletin qyzmet sapasyn jaqsartý jóninde naqty mindetter júktegen bolatyn. Osy tapsyrmalardy júzege asyrý aıasynda Abaı oblysynda 10 temirjol vokzalyn rekonstrýktsııalaý qolǵa alyndy. Búgin mine, eki birdeı temir jol vokzalyn qaıta jańǵyrtyp, el ıgiligine berip otyrmyz. Jarma, Úshbıik, Aqtoǵaı, Degeleń, Jalańashkól, Shar vokzaldaryn qyrkúıek aıyna deıin kestege saı aıaqtaýdy josparlap otyrmyz. Semeı men Aıagóz qalasyndaǵy vokzaldar jyldyń sońynda deıin paıdalanýǵa beriledi. Bul jumystardyń basty maqsaty – turǵyndar men jolaýshylar úshin qolaıly jaǵdaı qalyptastyrý, qaýipsizdik talaptaryn kúsheıtý jáne temirjol qyzmetiniń sapasyn jańa deńgeıge kóterý. Jańartylǵan vokzaldar aýyl turǵyndary men óńir qonaqtaryna sapaly qyzmet kórsetip, halyq ıgiligine aınalady dep senemin. Osy ıgi iske atsalysyp, qoldaý kórsetken azamattarǵa alǵysymdy bildiremin, – dedi Berik Ýálı.
Qazaqstan Respýblıkasy Kólik vıtse-mınıstri Jánibek Taıjanov óz sózinde respýblıka boıynsha 124 vokzaldyń jańǵyrtylyp jatqanyn, sonyń ishinde eki nysan alǵash bolyp Abaı oblysynda paıdalanýǵa berilip otyrǵanyn atap ótti.
-Memleket basshysynyń tapsyrmasymen elimizde 2025 jyly bastalǵan, Táýelsizdik jyldaryndaǵy eń iri 124 temirjol vokzalyn jańǵyrtý baǵdarlamasy júzege asyrylýda. Aýqymdy joba elimizdiń kólik ınfraqurylymyn keshendi jańartýǵa, jolaýshylarǵa qyzmet kórsetý sapasyn arttyrýǵa jáne saıahat úshin zamanaýı, jaıly ári qaýipsiz jaǵdaılar jasaýǵa baǵyttalǵan, – dedi ol.
Qazirgi ýaqytta Abaı oblysynda «Qazaqstan temir joly» ulttyq kompanııasynyń vokzal ınfraqurylymyn jańǵyrtý baǵdarlamasy aıasynda 8 temirjol vokzalyn (Semeı, Aıagóz, Shar, Aqtoǵaı, Jalańashkól, Degeleń, Úshbıik jáne Jarma stantsııalary) jańǵyrtý jumystary jalǵasyp jatyr.
