Qaıta synama tapsyrǵan 19 adamnan COVID-19 tabyldy
NUR-SULTAN. QazAqparat - Elordada qaıta synama tapsyrǵan 19 adamnan koronavırýs ınfektsııasy tabyldy. Bul týraly elordanyń Qoǵamdyq densaýlyq saqtaý basqarmasynyń basshysy Sáýle Qısyqova aıtyp berdi, dep habarlaıdy QazAqparat tilshisi.
Qazirgi ýaqytta elordada vırýs juqtyrǵandar sany 264 adamǵa jetti. Sońǵy eki kúnde - 12-13 sáýir kúnderi 29 jaǵdaı tirkeldi.
«19 jaǵdaı - ókpeniń ekijaqty qabynýy, tynys alý qıyndyǵy boıynsha birneshe kúnnen beri statsıonarda jatqan naýqastardan tabyldy. Olardyń alǵashqy synamasynda koronavırýs ınfektsııasy tabylmaǵan edi», - dep atap ótti basqarma basshysy «Habar 24» telearnasyndaǵy brıfıngte.
Biraq, KVI dıagnostıkalaý men emdeý hattamasynda aýrý belgileri (rentgenogrammada nemese kompıýterlik tomografııada ókpeniń ekijaqty ózgeriske ushyraýy) baıqalǵan adamdardan qaıta synama alý usynylǵan.
«Osylaısha, dárigerler qaıta synama alǵan 19 naýqastan ınfektsııa tabyldy. Bul ádis arqyly koronavırýs ınfektsııasyn dıagnostıkalaý men emdeý tıimdi bolady. Taǵy 7 oqıǵa - naýqastarmen baılanysta bolǵandar, otbasy músheleri nemese birge jumys istegender arasynan tabyldy. Olar buǵan deıin oqshaýlanyp, tekserýden ótken jáne ınfektsııa rastalǵandyqtan, aýrýhanaǵa jatqyzyldy. Al 3 oqıǵa - koronavırýs ınfektsııasy boıynsha júrgizilgen monıtorıng barysynda tabyldy», - dedi Sáýle Qısyqova.
Buǵan deıin basqarma basshysy Nur-Sultanda koronavırýs ınfektsııasynan qaıtys bolǵan adam týraly aıtyp bergen edi.
