Qaıta saqtandyrýshylar men táýekel-menedjerlerdiń teris faktorlardyń áserin eleýsiz etýge kúshi jetedi - Borıs Ýmanov
ALMATY. 14 sáýir. QazAqparat /Erlik Erjanuly/ - Japondyq tájirıbe qarjylyq táýekelderdi basqarýda memleket pen jekeniń seriktestiginiń qajettiligi men qundylyǵyn kórnekti túrde kórsetip otyr.
Ony «Eýrazııa» saqtandyrý kompanııasy» AQ-nyń Basqarma tóraǵasy Borıs Ýmanov búgin Almatyda ótip jatqan 7-shi Halyqaralyq táýekel-menedjmenti konferentsııasynda aıtty.
«Qaıta saqtandyrýshylar men táýekel-menedjerleri búkilǵalamdyq problemalardy bir sátte sheshe almaıdy. Alaıda olardyń ekonomıkaǵa, halyqqa jáne memleketke túrli teris faktorlardyń áserin eleýsiz etýge kúshi jetedi. Buǵan keltirer mysal da bar. Japonııadaǵy jan túrshiktirer zilzala men tsýnamıden keıin aıdan asa ýaqyt ótti. Onda oryn alǵan apattyń saldarlaryn eń tómengi deńgeıge túsirýde teńdessiz sharalardyń qoldanylǵanyn atap kórsetkim keledi. Japonııada qutqarýshy róldi ǵımarattar men ınfraqurylymdyq qurylystardyń salyný sapasy, jerasty dúmpýlerindegi áreket erejelerine bala kezden úıretilgen turǵyndardyń daǵdylary, apattyq jáne qutqarý qyzmetteriniń jolǵa qoıylǵan jumysy atqardy», - deıdi Borıs Ýmanov.
Onyń paıymdaýynsha, álem elderiniń basym bóliginde qýaty osyǵan uqsas zilzala bola qalsa, onyń qurbanyna aınalatyn adamdar sany áldeqaıda kóp bolaryn ókinishpen aıtýǵa bolady. Gaıtıdegi zilzala nátıjesinde 220 myńnan astam adamnyń opat bolýy - osynyń qasiretti dáleli. Japondyq tájirıbe qarjylyq táýekelderdi basqarýda memleketpen birlesken bastamalar tabıǵı apattardy jeńip shyǵýǵa múmkindik beretin memleket pen jekeniń seriktestiginiń qajettiligi men qundylyǵyn aıqyn kórsetip otyr.
