«Qaıta oralmady»: kókshetaýlyq áıelge izdeý jarııalandy
KÓKShETAÝ. KAZINFORM – Kókshetaýda iz-túzsiz joǵalǵan áıelge izdeý jarııalandy. Aqmola oblysy PD baspasóz málimetinshe, aqpannyń 12-inde Maral Quttybaıqyzy Ábýovanyń joǵalǵany týraly polıtsııaǵa kúıeýi kelip aıtqan.
Anyqtalǵandaı, áıel 6 aqpanda úıden ketken, sodan beri týystarymen baılanysqa shyqpaǵan. Ózimen birge altyn áshekeılerin ala ketken.
«Ótinish túsken kúnnen bastap polıtsııa joǵalǵan áıelmen qarym-qatynasta bolǵandardy anyqtap, kórýi múmkin degen adamdar men kórshilerinen surastyrdy. Sonymen birge ol turǵan úıdiń aýmaǵyndaǵy, ortalyq saıabaq pen temirjol mańyndaǵy beınebaqylaý kameralarynyń jazbalary tekserildi. Ázirge, áıeldiń qaıda ekeni belgisiz», - dedi vedomstvodan.
Osy rette, tártip saqshylary joǵalǵan áıeldi kórgen nemese ornalasqan jerin biletin adamdar bolsa, dereý polıtsııaǵa habarlasýyn suraıdy.
Aıta ketsek, budan buryn Aqmola oblysynda 42 jastaǵy áıel eki kishkentaı balasymen joǵalyp ketkenin jazǵan edi.
