Qaıta óńdý sektorlarynyń tartymdylyǵyn saqtaý sharalary zańnamalyq deńgeıde qamtylady - Senat
Qujat Elbasynyń «100 naqty qadam» Ult josparyndaǵy 55, 56, 57,59, 63 jáne 86 qadamdaryn iske asyrýǵa baǵyttalǵan.
Tutastaı alǵanda, zań jobasy asa qolaıly ınvestıtsııalyq klımat qalyptastyrý úshin ınvestıtsııalar salasyndaǵy, Qazaqstandaǵy týrızm ındýstrııasyn odan ári júıeli túrde damytý úshin týrıstik saladaǵy, ǵylymdy qajet etetin ekonomıkany qalyptastyrý maqsatynda ınnovatsııalyq klaster salasyndaǵy zańnamalardy odan ári jetildirý kózdeledi.
Bul rette zań jobasymen ındýstrııalyq-ınnovatsııalyq qyzmet sýbektileri úshin qaıta óńdý sektorlarynyń tartymdylyǵyn saqtaý maqsatynda ınvestıtsııalyq jobalardy iske asyrý barysynda paıdalanylatyn shıkizattar jáne materıaldardy ımporttaý kezinde salyqtyq jáne kedendik jeńildikter qarastyrylady.
Sonymen qatar, Elbasynyń tapsyrmasyn oryndaý úshin transulttyq kompanııalardyń qatysýymen birlesken kásiporyndar qurý kózdeledi. Sheteldikterdi qosa alǵanda ınvestıtsııalyq qorlar arqyly joǵary tehnologııalyq startap-kompanııalardy tartý boıynsha derbes klasterlik qordyń ókilettikterin keńeıtý usynylady.
Máselen, ınnovatsııalyq klaster salasynda ǵylymdy qajet etetin ekonomıkany qalyptastyrý úshin eki ınnovatsııalyq klaster júzege asady. Onyń biri, Astanada Nazarbaev Ýnıversıteti bazasynda qurylady. Onda ǵylymı zertteýler jasaý jáne ony sońynan kommertsııalandyrý úshin ǵylymı ortalyqtar, zerthanalar ornalasady. Ekinshisi, Almaty qalasynda óńirdegi joǵary oqý oryndary men ulttyq ortalyqtardyń ǵylymı-shyǵarmashylyq áleýetin paıdalaný úshin qurylady. Almatydaǵy ınnovatsııalyq klaster aldyna iri sheteldik joǵary tehnologııalyq kompanııalar men jergilikti kompanııalardy tarta otyryp, jobalardy júzege asyrý mindeti qoıylǵan. Bul úshin ınnovatsııalyq tehnologııalar parkine birlesken kásiporyndar qurý úshin basqarýshy organnyń ókilettigin keńeıtý usynylady.
Budan bólek, zań jobasy energııa tıimdiligin arttyrý maqsatynda birqatar sharalardy qarastyrady. Atap aıtqanda, osy salaǵa jeke ınvestıtsııalardy tartý maqsatynda birqatar zańnamalyq kedergilerdi alyp tastaý kózdelgen.
