Qaıta óńdeýge 131 myń tonnadan astam qaldyq jiberildi
ASTANA. KAZINFORM — Júıe iske qosylǵaly beri oǵan qatysýǵa 159 kásiporyn ótinim bergen
Qaldyqtardy jınaý jáne qaıta óńdeý úderisterin tsıfrlandyrý maqsatynda «Jasyl damý» AQ ázirlegen EcoQolday aqparattyq júıesi qatysýshylar sanyn ulǵaıtyp, qaıta óńdeý kólemin turaqty túrde arttyryp keledi. Júıe iske qosylǵaly beri oǵan qatysýǵa 159 kásiporyn ótinim bergen. Onyń ishinde 104-i qaldyq jınaýshylar, 32-si qaıta óńdeýshi kásiporyndar, 23-i tolyq tsıkldi kásiporyndar.
Búginde júıe qatysýshylarymen 96 kelisimshart jasaldy. Onyń ishinde 64 qaldyq jınaýshymen, 20 qaıta óńdeýshimen jáne 12 tolyq tsıkldi kásiporynmen kelisimge qol qoıyldy. Sonymen qatar, aldyn ala maquldaýdan ótken tórt kásiporyn kóshpeli tekserýdi kútýde, taǵy eki ótinim qaralý ústinde.
Júıe 2024 jylǵy tamyz aıynan beri jumys istep keledi. Osy ýaqyt ishinde EcoQolday arqyly 131,04 myń tonna qaldyq qaıta óńdeýge jiberildi. Onyń negizgi bóligin 92,05 myń tonna qaǵaz jáne 28,86 myń tonna shyny. Sonymen qatar, 8,74 myń tonna paıdalanylǵan shınalar, 1,32 myń tonna plastık qaldyqtary jáne 0,07 myń tonna aralas materıaldardan turatyn qaldyqtar qaıta óńdeldi.
Qaıta óńdeý kólemi jyl saıyn artyp keledi. Eger 2024 jyly júıe arqyly 11,07 myń tonna qaldyq qaıta óńdeýge jiberilse, 2025 jyly bul kórsetkish 49,34 myń tonnaǵa jetti. Al 2026 jyldyń alǵashqy jartyjyldyǵynda ǵana 70,63 myń tonna qaldyq qaıta óńdeýge baǵyttaldy. Bul júıeniń tıimdiliginiń artyp, bıznes ókilderiniń qatysý aıasynyń keńeıip kele jatqanyn kórsetedi.
— Bekitilgen bıýdjetter sheńberinde júıe qatysýshylaryna 3,416 mlrd teńge tólendi. Onyń ishinde 2024 jyly — 4,6 mln teńge, 2025 jyly — 884,4 mln teńge, al 2026 jyly búgingi kúnge deıin — 2,527 mlrd teńge tólengen. Bul tólem tetigi qaldyqtardy jınaý jáne qaıta óńdeý ınfraqurylymyn damytýǵa, sondaı-aq qaıtalama shıkizatty ekonomıka aınalymyna tartý kólemin ulǵaıtýǵa yqpal etedi, — delingen habarlamada.
EcoQolday júıesi sala kásiporyndarymen qatar halyqtyń da belsendi qatysýyn qamtamasyz etýde. Esepti kezeńdegi málimet boıynsha, júıede qaldyq túzýshilerden 1 081 ótinim tirkelgen. Jalpy kólemi 3 540,52 tonna qaldyq qaıta óńdeýge tapsyryldy.
Onyń ishinde 629 ótinimdi jeke tulǵalar bergen. Olar negizinen shyny, qaǵaz jáne paıdalanylǵan shınalardy ótkizip, jalpy 2 276,42 tonna qaldyqty qaıta óńdeýge jiberdi. Al 452 ótinim zańdy tulǵalardan túsip, olar 1 264,1 tonna qaldyq tapsyrdy. Onyń basym bóligin qaǵaz ben paıdalanylǵan shınalar quraıdy.
«Jasyl damý» AQ halyq arasynda qaldyqtardy bólek jınaý mádenıetin qalyptastyrý baǵytyndaǵy jumystaryn da júıeli túrde jalǵastyrýda. «Taza úı — Taza el» pılottyq jobasy aıasynda Astana qalasyndaǵy turǵyn úı keshenderine qaǵaz jáne plastık qaldyqtaryn bólek jınaýǵa arnalǵan arnaıy konteınerler ornatyldy. Joba kezeń-kezeńimen elimizdiń ózge óńirlerinde de keńeıtilýde.
Sonymen qatar, 2026 jyldan bastap jergilikti atqarýshy organdarmen birlesip Aqtaý qalasynda, Aqtóbe oblysynda, sondaı-aq Shymkent jáne Taldyqorǵan qalalarynda PIK jáne MIB ókilderimen kezdesýler uıymdastyrylyp keledi. Kezdesýler barysynda EcoQolday júıesiniń jumys qaǵıdattary men turǵyndardy tarta otyryp qaldyqtardy bólek jınaýdy uıymdastyrý máseleleri túsindirilýde.
«Jasyl damý» AQ aldaǵy ýaqytta da qaldyqtardy basqarýdyń tsıfrlyq tetikterin jetildirýdi, EcoQolday júıesiniń geografııasyn keńeıtýdi, qaıta óńdeý kólemin arttyrýdy jáne bıznes pen halyqtyń aınalym ekonomıkasyn qalyptastyrýǵa belsendi qatysýyna qolaıly jaǵdaı jasaýdy jalǵastyrady.
Aıta ketelik Qazaqstanda qaldyqtardy qaıta óńdeý deńgeıi 2030 jylǵa qaraı 40%-ǵa jetedi.
