Qaıta óńdeý jáne tamaq ónerkásibi salasyn ǵylymı turǵydan qamtamasyz etýdiń mańyzdy máseleleri talqylandy
ASTANA. 22 aqpan. QazAqparat - Búgin «QazAgroInnovatsııa» AQ ǵımaratyndaǵy Qazaq aýyl sharýashylyǵy ónimin qaıta óńdeý ǵylymı-zertteý ınstıtýty bazasynda «AgroBıznes-2020» baǵdarlamasy sheńberindegi keńes bolyp ótti.
«Qazaqstannyń qaıta óńdeý jáne tamaq ónerkásibi salasyn ǵylymı turǵydan qamtamasyz etýdiń mańyzdy baǵyttaryn qalyptastyrý máseleleri» degen taqyryptaǵy basqosýǵa Aýyl sharýashylyǵy mınıstrliginiń, agroónerkásip jáne agrobıznes salasyndaǵy qoǵamdyq birlestik ókilderi, sondaı-aq «QazAgroInnovatsııa» AQ ǵalymdary qatysty.
Keńes barysynda saladaǵy sheshimin tappaı otyrǵan problemalar talqylandy. Atap aıtqanda, aýyl sharýashylyǵy ónimin qaıta óńdeý ónimderiniń tapshylyǵy, shıkizat sapasynyń nasharlyǵy, qural-jabdyqtardyń tozýy, kadr kemdigi jaıynda áńgime órbip, aýyl sharýashylyǵy shıkizatyn tereńdete qaıta óńdeýdi sýbsıdııalaý tetiginiń bolmaı otyrǵanyna nazar aýdaryldy.
Osyǵan oraı, Qazaq aýyl sharýashylyǵy ónimin qaıta óńdeý ınsıtıtýtynyń ǵalymdary «QazAgroInnovatsııa» janynan arnaıy jumys tobyn qurý týraly bastama jasady. Oǵan agroónerkásip kesheniniń qaıta óńdeý kásiporyndary qyzmetkerlerin qatystyrý usynyldy. Osylaısha, salany tehnologııalyq turǵydan damytý problemalaryn sheshýge baǵyttalǵan zertteýlerdi qalyptastyrý kózdeledi. Bul «Agrobıznes-2020» baǵdarlamasyn birlesip iske asyrýda meılinshe mol nátıjege jetýge múmkindik bermek.
«Toqtala ketetin jaıt, «Agrobıznes-2020» baǵdarlamasynda aýyl sharýashylyǵy shıkizatyn tereńdete óńdeýdi damytýǵa basa nazar aýdarylǵan. Baǵdarlama mindetteriniń biri aýyl sharýashylyǵy shıkizatyn tereńdete óńdeý úshin taýarlardyń, jumystardyń jáne kórsetiletin qyzmetterdiń ekonomıkalyq turǵydan qoljetimdiligin arttyrý bolyp tabylady. Osyǵan baılanysty shyǵyndarǵa sýbsıdııa berý arqyly memleket tarapynan qoldaý sharalary da kózdelgen», - delingen baspasóz habarlamasynda.
Mamandardyń aıtýynsha, memleket tarapynan jasalatyn mundaı qoldaý otandyq qaıta óńdeýshi kásiporyndardyń Kedendik odaq elderiniń kásporyndarymen tepe-teń jaǵdaıda jumys isteýine múmkindik týǵyzady. Osynyń nátıjesinde básekege qabiletti ónim óndirilip, ishki tutynýdaǵy ımporttyń úlesi azaıa túsedi, kásiporyndardyń qarjylyq-sharýashylyq qyzmetine oń yqpal etiledi.
