Qaıta qylmys jasaǵan alaıaqqa zańsyz jasalǵan raqymshylyqtyń kúshi joıyldy
QARAǴANDY. KAZINFORM – Qaraǵandy oblysynyń turǵyny buǵan deıin alaıaqtyq jasaǵany úshin sottalǵanyna qaramastan, jazasyn óteý kezeńinde qaıtadan qylmys jasaǵan.
Atap aıtqanda, ol Instagram áleýmettik jelisinde áıelder kıimin satý týraly habarlandyrý ornalastyryp, azamattardan aldyn ala tólem alǵan. Alaıda taýardy jetkizbeı, túsken qarajatty qalaýy boıynsha jumsaǵan.
Temirtaý qalalyq sotynyń úkimimen atalǵan áıel alaıaqtyq jasaǵany úshin kináli dep tanylyp, 3 jyl 6 aı merzimge bas bostandyǵynan aıyrylǵan. Apellıatsııalyq satydaǵy sot oǵan «Qazaqstan Respýblıkasy Konstıtýtsııasynyń otyz jyldyǵyna baılanysty raqymshylyq jasaý týraly» Zańdy qoldanyp, jazany 2 jyl 4 aıǵa deıin qysqartqan. Alaıda sot aktilerin tekserý barysynda raqymshylyqtyń zańsyz qoldanylǵany anyqtaldy.
Zańǵa sáıkes, aldyńǵy úkim boıynsha jazasyn óteý kezeńinde qasaqana qylmys jasaǵan adamdarǵa raqymshylyq qoldanýǵa tikeleı tyıym salynady.
Bas prokýratýranyń narazylyǵy boıynsha raqymshylyqty qoldanýdyń kúshi joıyldy. Sottalǵan áıelge 3 jyl 6 aı merzimge bas bostandyǵynan aıyrý jazasy taǵaıyndaldy.
Raqymshylyq – gýmanızm aktisi. Alaıda ol jazasyn óteý kezinde qaıtadan qasaqana qylmys jasaǵan adamdardy jaýaptylyqtan bosatpaıdy.
Buǵan deıin bıyl 15 myń qylmystyq jazasyn óteýshige raqymshylyq jasalatynyn habarlaǵan edik.
