Qaıta-qaıta qońyraý shalý men ańdyǵandar úshin jaza bar: stalkıngke qatysty zań ne deıdi
ASTANA. KAZINFORM — Qaıta-qaıta qońyraý shalý, habarlama jazý, ańdý men ruqsatsyz baılanys ornatý stalkıng belgileri bolýy múmkin. Qazaqstanda mundaı áreketter úshin qandaı jaza qarastyrylǵanyn Astana qalasynyń prokýratýrasy túsindirdi. Bul týraly Astana qalasynyń ákimdigi málim etti.
Qazaqstan Respýblıkasynyń Qylmystyq kodeksine sáıkes, stalkıng — adamnyń erkinen tys onymen baılanys ornatýǵa nemese ony ańdýǵa baǵyttalǵan zańsyz áreketter. Mundaı qýdalaý kúsh qoldanýmen ushtaspasa da, adamǵa eleýli zııan keltirgen jaǵdaıda qylmystyq quqyq buzýshylyq bolyp sanalady. Bul týraly elordanyń Kommýnıkatsııalar qyzmetinde ótken brıfıngte Astana qalasy Almaty aýdany prokýratýrasy bóliminiń aǵa prokýrory Azat Barbolov túsindirdi.
— Stalkıng qaıta-qaıta qońyraý shalý, habarlama jiberý, kezdesýge umtylý, adamnyń úıine nemese jumys ornyna barý, ony kútip turý, ańdý sııaqty áreketterden kórinýi múmkin. Sondaı-aq adam baılanys ornatýdan bas tartsa da, onyń qyr-sońynan ańdý stalkıng belgileriniń biri bolýy yqtımal. Degenmen árbir qońyraý nemese habarlama ózdiginen qylmystyq quqyq buzýshylyq bolyp sanalmaıdy. Áreketke quqyqtyq baǵa bergende onyń sıpaty men qaıtalaný jıiligi, adamnyń kelisiminiń bolmaýy, keltirilgen zııannyń eleýliligi, sondaı-aq qýdalaý áreketteri men olardyń saldary arasyndaǵy sebep-saldarlyq baılanys eskeriledi, — dedi aǵa prokýrory Azat Barbolov.
Qylmystyq kodekstiń 115-1-babynda stalkıng úshin eki júz aılyq eseptik kórsetkishke deıingi mólsherde aıyppul, túzeý jumystary, eki júz saǵatqa deıingi qoǵamdyq jumystar nemese elý táýlikke deıingi qamaq túrindegi jazalar kózdelgen.
— Sot tájirıbesinde stalkıng jasaǵan adamǵa jaza taǵaıyndaýmen qatar, jábirlenýshini qorǵaýǵa baǵyttalǵan qosymsha sharalar da qoldanylýda. Máselen, Astana qalasynyń sotynda qaralǵan is boıynsha sottalýshy 80 saǵat qoǵamdyq jumystarǵa tartylyp, oǵan alty aı merzimge jábirlenýshini izdeýge, qýdalaýǵa jáne onymen baılanys ornatýǵa tyıym salynǵan, — dep túsindirdi maman.
Qazaqstan Respýblıkasynyń Qylmystyq kodeksiniń 98-3-babyna sáıkes, sot adamnyń minez-qulqyna erekshe talaptar belgileı alady. Іstiń mán-jaılaryna qaraı jábirlenýshini izdeýge, qýdalaýǵa, oǵan barýǵa, telefon arqyly sóılesýge jáne ózge de tásildermen baılanys ornatýǵa tyıym salynýy múmkin.
Mamandardyń aıtýynsha, eger adam qaıta-qaıta qalaýsyz qýdalaýǵa tap bolsa, qońyraýlar men habarlamalardy óshirmeı, saqtap qoıǵany jón. Olar qajet bolǵan jaǵdaıda quqyq qorǵaý organdaryna dálel retinde usynylýy múmkin. Stalkıng úshin qylmystyq jaýaptylyqtyń engizilýi adamnyń jeke shekarasyn qorǵaýǵa jáne qaıta-qaıta qýdalaý áreketteriniń aldyn alýǵa múmkindik beredi.
Buǵan deıin elordada stalkıng úshin jaýapkershilik kúsheıgenin jazdyq.
