Qaıta ashylǵan elorda kásiporyndary qaýipsizdik talaptaryn qalaı saqtaýda
NUR-SULTAN. QazAqparat - Qaıta ashylǵan kásiporyndarda jeke jáne qoǵamdyq tazalyq sharalary kúsheıtildi, dep habarlaıdy Nur-Sultan qalasy ákimdiginiń resmı saıty.
Іri paneldi jáne karkas-jınaqtaý qurylysy úshin temir-beton buıymdaryn shyǵaratyn «GLB» JShS-nyń basqarýshy dırektory Eldar Qasymovtyń aıtýynsha, kásiporynda ınfektsıonıst-dárigerler kezekshilik etedi. Qyzmetkerlerdi jetkizý qyzmeti uıymdastyrylǵan. Ol úshin arnaıy alty avtobýs bólingen. Avtobýstarǵa kún saıyn dezınfektsııa jasalady. «Kásiporynǵa kireberiste ár qyzmetkerdiń dene qyzýy ólshenedi. Barlyq qyzmetkerge betperde men qolǵap beriledi. Baqylaý pýnktine kireberiste antıseptıkalyq suıyqtyq qoıylǵan. Zaýyt aýmaǵynda, ıaǵnı ár qabat pen ár óndiristik ǵımaratta 2-3-ten ornatylǵan 24 dozator bar. Sondaı-aq biz dezınfektsııalyq uıymmen kelisim jasastyq. Sol arqyly kıim aýystyratyn, jýynatyn bólmeler men keńse jáne ashanaǵa dezınfektsııa jasalady. Kún saıyn aýysymnan keıin eki myń sharshy metrden astam jerge tazalyq jumysyn júrgizemiz», - deıdi E.Qasymov.
Mundaı qaýipsizdik sharalaryn «Lashyn faktor» JShS-de júrgizedi. Marketıng dırektory Asyl Ahmetovanyń aıtýynsha, jumysqa qaıta kiriser aldynda zaýytqa tolyqtaı dezınfektsııa jasalǵan.
Eske salaıyq, Nur-Sultanda 20 sáýirden bastap birqatar kásiporyn jumysyn bastady. Atap aıtsaq: - qurylys jáne jol qurylysy salasyndaǵy kompanııalar, iri qurylys dúkenderi; - kólik, qoıma, aýylsharýashylyq qyzmet kórsetetin kompanııalar; - avtosalondar, qyzmet kórsetý stantsııalary, avtojýý, shınalarǵa qyzmet kórsetý, avto bólshekter satatyn dúkender, hımııalyq tazalaý, keńse tehnıkalaryn jóndeý. Ekinshi deńgeıli bankterde shtattyq quramnyń 50%-na saǵat 09:00-den 16:00-ge deıin ruqsat etilse, notarıýstar aldyn ala jazylý boıynsha jumys isteıdi. Qoǵamdyq tamaqtaný oryndary tek ózimen alyp ketý jáne jetkizý qyzmeti boıynsha 22:00-ge deıin jumys isteı alady.
