Qaıta ashylǵan bıznes nysandary jospardan tys tekserilýi múmkin
Bul týraly Nur-Sultan qalasy Taýarlar men qyzmetterdiń qaýipsizdigi men sapasyn baqylaý departamenti Jumys orny men kommýnıkatsııalyq nysandardaǵy juqpaly aýrýlar boıynsha qadaǵalaý bóliminiń basshysy Gúlnar Qalıeva aıtyp berdi.
«Nur-Sultan qalasy boıynsha koronavırýs ınfektsııasyn taratpaý boıynsha Jedel shtabtyń sheshimimen jumysyn qaıta bastaıtyn kásiporyndardy aýdandyq ákimdikter baqylaıdy. Ákimdikter kásiporyndarǵa qoıylatyn talaptardyń qanshalyqty oryndalyp jatqanyn tekseredi», - dep túsindirdi spıker «Atameken» ulttyq kásipkerler palatasy júrgizgen onlaın brıfıngte.
Odan bólek, ákimdik talaptardy buzǵan nysandar jóninde Taýarlar men qyzmetterdiń qaýipsizdigi men sapasyn baqylaý departamentine aqparat jibere alady. Osy málimet negizinde departament Kásipkerlik kodeksiniń 144-baby, 6-bóligine sáıkes jospardan tys tekserý júrgize alady.
«Bul bapqa sáıkes, ınfektsııalyq aýrýdyń taralý qaýpi týyndaǵan jaǵdaıda, máselen qazir KVI jaǵdaıynda aýmaqtyq organdar nysanǵa eskertý jasamastan, tekserý taǵaıyndaý aktin jasamastan,tekserý júrgizýge quqyly», - dedi G. Qalıeva.
Buǵan deıin Gúlnar Qalıeva 20 sáýirden bastap qaıta ashylatyn kásiporyndarǵa qandaı talaptar qoıylatynyn túsindirgen edi.