«Qaısarǵa» Armenııa quramasynyń fýtbolshysy keldi
QYZYLORDA. QazAqparat - Qyzylordanyń «Qaısar» klýby taǵy bir sheteldik oıynshymen tolyqty. Komanda basshylyǵy Armenııa quramasynyń shabýylshysy Tıgran Barsegıanmen kelisimshartqa qol qoıdy, dep habarlaıdy QazAqparat tilshisi.
Tıgran Barsegıan 1993 jyldyń 22 qyrkúıeginde Armenııa astanasy - Erevan qalasynda dúnıege kelgen. Kásibı fýtboldaǵy alǵashqy qadamyn 2009 jyly Armenııanyń «Pıýnık» komandasynda bastaǵan. 2011-2013, 2015-2016 jyldarda sol eldiń «Gandzasar», 2014-2015 jyldarda «Mıka» komandalarynda oınady. 2016 jyldan beri Makedonııanyń «Vardar» komandasynyń namysyn qorǵap, bul klýbta 54 oıynda 2 goldyń avtory atandy.
Fýtboldan Armenııa quramasy sapynda 2016 jyldan beri oıyn kórsetip keledi. Búgingi kúnge deıin 16 kezdesýde qarsylastar qaqpasyna 2 gol soqqan. Alǵashqy golyn 2016 jyldyń 1 maýsymynda Salvador quramasymen kezdesýde soqsa, ekinshisin 2018 jyldyń 6 qyrkúıeginde Ulttar lıgasynda Lıhtenshteın quramasynyń qaqpasyna engizdi.
«Qaısar» qańtardyń alǵashqy kúnderinen bastaý alǵan oqý-jattyǵý jıynynyn alǵashqy kúnderi klýb basshylyǵy jartylaı qorǵaýshy Marat Haırýllın, qorǵaýshy Ivan Sadovnıchıı kelisim shartqa otyrdy. Sondaı-aq, byltyrǵy jyly oıyn kórsetken 15 fýtbolshymen kelisim-shart merzimin uzartty. Odan keıin komanda quramyna horvatııalyq qorǵaýshy Marın Orshýlıch qosyldy. Arýba quramasynyń jartylaı qorǵaýshysy Djon Djoshýa bıyl «Qaısar» quramyn tolyqtyrdy. Al 22 qańtarda «Qaısar» kongolyq Kýle Mbombomen kelisimshartqa otyrdy.
Qazir «Qaısardyń» quramynda horvatııalyq qorǵaýshylar Ivan Graf pen Marın Orshýlıch, kamerýndyq qorǵaýshy Abdel Azız Lamanj, serb shabýylshysy Bratıslav Pýnoshevats, arýbalyq jartylaı qorǵaýshy Djon Djoshýa, kongolyq Kýle Mbombo bar.
«Qaısar» 22 qańtarda Túrkııada Ýkraınanyń «Olımpık» komandasymen joldastyq kezdesý ótkizdi. Bul oıynda «Qaısar» atalmysh qarsylasynan 1:3 esebimen jeńilip qaldy.
