«Qaısardyń» jańa bas bapkeri Stoıcho Mladenov oblys ákimin maqsat-mindetterimen tanystyrdy
QYZYLORDA. QazAqparat-Oblys ákimi Qyrymbek Kósherbaev qyzylordalyq «Qaısar» fýtbol klýbynyń bas bapkerligine taǵaıyndalǵan Stoıcho Mladenovty qabyldady, dep habarlady QazAqparat HAA tilshisi.
Bolgarlyq maman aımaq basshysyna alǵa qoıǵan maqsattaryn aıtyp, jergilikti jankúıerler senimin aqtaýǵa kúsh salatynyn jetkizdi.
Qabyldaýdan soń BAQ ókilderine suhbat bergen bas bapker Premer-lıgaǵa qaıtyp oralǵan klýbtyń múmkindigi zor ekendigin jetkizdi.
«Komanda joǵary lıgaǵa jeńis úshin keldi dep oılaımyn. Oıynshylar quramynda azdy-kópti ózgerister bolýy múmkin. Jalpy, komandanyń oıyn órnegi kóńilimnen shyqty. Oblys ákimine úlken alǵys aıtamyn, qoldaý bar, qarjy bar. Tek, jaqsy nátıjege jetýge tıispiz. Negizgi maqsatymyz - maýsymdy úzdik altylyq qatarynda aıaqtaý. Buǵan tolyqqandy múmkindik bar», - dedi bas bapker.
Aıta keteıik, «Qaısar» fýtbol klýby maýsymdaǵy alǵashqy oıynyn 8 naýryz kúni ótkizedi. Jerlesterimiz óz alańynda Kókshetaýdyń «Oqjetpesin» qabyldaıdy.
