«Qaısardyń» quramynda Arýba quramasynyń fýtbolshysy oınaıdy
QYZYLORDA. QazAqparat - Qyzylordanyń «Qaısar» komandasynyń basshylyǵy taǵy bir fýtbolshymen kelisimshartqa qol qoıdy. Arýba quramasynyń jartylaı qorǵaýshysy Djon Djoshýa endi jyl sońyna deıin qyzylordalyq klýbtyń namysyn qorǵaıdy, dep habarlaıdy QazAqparat tilshisi.
Djon Djoshýa 1988 jyldyń 1 qazanynda Gollandııanyń Alkmaar qalasynda dúnıege kelgen. Aldymen sol eldiń «Valveık», Rotterdamnyń «Sparta» komandalarynyń jastar quramynda boldy. 2007 jyldan kásibı fýtbolǵa qadam basty. Tórt jyl boıy Rotterdamnyń «Sparta» klýbynda ter tókken ol odan keıin 2012-2013 jyldary Enshed qalasynyń «Tvente» komandasynyń jeıdesin kıdi. Al 2013-2016 jyldary Danııanyń «Nordshelland» komandasynda oınasa, 2016 jyldan beri Túrkııanyń «Býrsaspor» klýbynda oıyn kórsetedi.
Aıta keterligi, 2009-2010 jyldarda Gollandııanyń 21 jasqa deıingi jastar quramasy sapynda bes oıynǵa qatysyp, qarsylastar qaqpasyna eki gol soqty. 2018 jyldan beri tarıhı otany - Arýba quramasynda oıyn kórsete bastady.
Ol «Qaısar» komandasynyń baspasóz qyzmetine alǵashqy suhbatyn berdi.
«Men Gollandııada arýbalyq emmıgranttar otbasynda dúnıege keldim. Arýba - Karıb teńizinde shaǵyn aralda ornalasqan memleket. Buǵan deıin Qazaqstan fýtboly jaıynda kóp nárse bile bermeıtin edim. Chempıondar lıgasynda «Astana» klýbynyń oıyn kórsetkeninen azdap habarym bar. Men qyzylordalyq jankúıerlerdiń senimin aqtaýǵa tyrysamyn», - dedi Djon Djoshýa.
Arýba quramasy 2018 jyldyń 20 jeltoqsanyndaǵy esepte FIFA reıtınginde 187-orynda tur. Quramada Gollandııa, Norvegııa memleketterinde oınaıtyn fýtbolshylar bar.
Qazir «Qaısardyń» quramynda horvatııalyqtar Ivan Graf pen Marın Orshýlıch, kamerýndyq qorǵaýshy Abdel Azız Lamanj, serb shabýylshysy Bratıslav Pýnoshevats bar.
Esterińizge sala ketelik, «Qaısar» komandasy qańtar aıynyń basynda Túrkııada jańa maýsymǵa daıyndyǵyn bastady.
Budan buryn «Qaısar» komandasynyń basshylyǵy birden 17 fýtbolshymen kelisim-shart jasaǵanyn habarlaǵan edik.
Sondaı-aq, «Qaısar» komandasynyń bas bapkeri Stoıcho Mladenov bıyl da qyzmetin jalǵastyratyn boldy.
Qyzylordanyń «Qaısar» komandasy 2019 jyly júldeli orynnyń birine iligý maqsatyn kózdep otyr.
