«Qaısardyń» quramyn 18 jastaǵy fýtbolshy tolyqtyrdy - Qyzylorda oblysy
QYZYLORDA. QazAqparat - Qyzylordanyń «Qaısar» komandasy qataryna 18 jastaǵy jergilikti fýtbolshy Bekzat Qurmanbekuly qosyldy, dep habarlaıdy QazAqparat tilshisi.
Bekzat Qurmanbekuly «Qaısar» komandasynyń túlegi sanalady. Byltyr ol birinshi lıgada oıyn kórsetetin «Baıqońyr» komandasy sapynda jasyl alańǵa shyqty. Atalmysh klýb sapynda birinshi lıgada 22 márte jasyl alańǵa shyǵyp, qarsylastar qaqpasyn 1 márte dál kózdeı bildi. Sondaı-aq, ol «Qaısardyń» jastar quramy sapynda 9 márte oınady.
Sondaı-aq, bıyl «Qaısardyń» quramynda alǵash ret jergilikti fýtboldyń túlegi shabýylshy Shoqan Abzalov ta dop tebedi. Ol buǵan deıin «Baıqońyr» komandasy sapynda 16 kezdesýge qatysyp, 6 márte qarsylastar qaqpasyn dál kózdedi.
Bıyl «Qaısardyń» quramyna jergilikti fýtbolshylar kóptep tartyldy. Shabýylshy Órken Mahan da bıyl qyzylordalyq klýb jeıdesin kıedi.
Budan buryn habarlaǵanymyzdaı, «Qaısar» 21 aqpanda Túrkııada oqý-jattyǵý jıynynyń sońǵy oıynyn ótkizdi. Onda Túrkimenstannyń «Altyn asyr» komandasyn 4:0 esebimen oısyrata jeńdi.
