«Qaısardyń» qatary taǵy bir fýtbolshymen tolyqty
QYZYLORDA. QazAqparat - Qyzylordanyń «Qaısar» komandasynyń qatary taǵy bir oıynshymen tolyqty. Komanda basshylyǵy horvatııalyq qorǵaýshy Marın Orshýlıchpen kelisimshartqa qol qoıdy, dep habarlaıdy QazAqparat tilshisi.
Marın Orshýlıch 1987 jyldyń 28 tamyzynda dúnıege kelgen. Fýtbolshy mansabyn 2009 jyly Horvatııanyń «Zagreb» klýbynda bastaǵan. 2012 jyly Ázerbaıjannyń «Hazar» (Lenkoran) komandasyna keldi. Odan keıin qaıtadan Horvatııaǵa oralyp, 2013 jyly «Zadar» komandasynda dop tepti. 2014 jyly Bolgarııanyń TsSKA (Sofııa), 2015 jyly Norvegııanyń «Tromse», 2016 jyly Kıprdiń «Omonııa» klýbtarynyń jeıdesin kıdi. Al sońǵy eki jylda Ońtústik Koreıanyń «Sonnam» komandasynyń jeıdesin kıdi.
Esterińizge sala ketelik, budan buryn «Qaısar» komandasynyń basshylyǵy birden 17 fýtbolshymen kelisim-shart jasaǵanyn habarlaǵan edik.
«Qaısar» komandasy qańtar aıynyń basynda Túrkııada jańa maýsymǵa daıyndyǵyn bastady.
Sondaı-aq, «Qaısar» komandasynyń bas bapkeri Stoıcho Mladenov bıyl da qyzmetin jalǵastyratyn boldy. Qyzylordanyń «Qaısar» komandasy 2019 jyly júldeli orynnyń birine iligý maqsatyn kózdep otyr.
