«Qaısardyń» bas bapkeri qyzmetinen kete me
QYZYLORDA. QazAqparat - Qyzylordanyń «Qaısar» komandasynyń bas bapkeri Stoıcho Mladenovti qyzmetinen alyp tastaý jóninde eshqandaı sheshim qabyldanǵan joq. Bul jóninde QazAqparat tilshisine oblystyq dene shynyqtyrý jáne sport basqarmasynyń basshysy Oljas Ákimov málim etti.
«Qaısar» alǵashqy úsh týrdy sátsiz ótkizdi. Alǵashqy eki oıyn óz alańynda bolǵanyna qaramastan «Aqtóbeden» 0:1 esebimen jeńilip, «Aqjaıyqpen» 1:1 esebimen teń tústi. Al syrt alańda azýly «Astanaǵa» 0:2 esebimen jol berdi. Úsh týrda nebári 1 upaı alǵan qyzylordalyq fýtbolshylar týrnır kestesinde toǵyzynshy orynda tur.
«Sportta mundaı jaǵdaılar kezdesedi. «Qaısarda» ázirge sáttilik jetispeı júrgen sekildi. Komanda aldaǵy ýaqytta jankúıerlerdi qýantarlyq nátıjege qol jetkizedi degen oıdamyn»,- dedi basqarma basshysy.
Birqatar aqparat quraldary S.Mladenov «Qaısardyń» 7 sáýirde syrt alańda «Jetisýdy» jeńe almasa qyzmetinen ketýi múmkin degen boljam aıtqan edi.
Ústimizdegi jyly basty quryltaıshy - oblys basshylyǵy «Qaısardyń» aldyna úzdik bestikte bolý mindetin qoıǵan bolatyn.
Ádilet Qańtarbaev
