«Qaısardyń» bas bapkeri qyzmetin jalǵastyratyn boldy
QYZYLORDA. QazAqparat - Qyzylordanyń «Qaısar» komandasynyń bas bapkeri Stoıcho Mladenov 2019 jyly qyzmetin jalǵastyratyn boldy, dep habarlaıdy QazAqparat tilshisi.
Bolgar mamany bul jańalyqty óziniń jeke saıtynda jankúıerge jarııa etti. «Men aldaǵy jyly da sizdermen birge bolǵanyma qýanyshtymyn. Maǵan senim bildirgen oblys basshylyǵyna rızashylyǵymdy bildirgim keledi. Qyzylordadaǵy jumysyma qanaǵat bildiremin. Qanshama erekshe jaǵdaılar boldy. Aldaǵy jyly budan da joǵary tabystarǵa qol jetkizemiz degen úmittemin», - dep jazdy Stoıcho Mladenov.
Jańa kelisimshart bir jylǵa jasalady. Ol komanda sátti oıyn kórsetken jaǵdaıda taǵy da bir jylǵa uzartylýy múmkin. Bolgar mamany «Qaısar» komandasy bas bapkeri qyzmetin 2017 jyldan beri atqaryp keledi. 2017 jyly «Qaısar» birinshilikti altynshy orynda aıaqtasa, bıyl alǵashqy bestikke endi.
Aıta ketelik, búgin Qyzylorda qalasynda «Qaısar» komandasy úshin birqatar sharalar uıymdastyrylady. Aldymen komandanyń 1998 jyly Qazaqstan kýbogyn jeńip alǵan úzdik quramy men ár jyldarda atalmysh klýb namysyn qorǵaǵan fýtbolshylar joldastyq kezdesý ótkizedi. Odan keıin «Qaısar» fýtbol klýbynyń 50 jyldyǵyna oraı jáne bıylǵy dop dodasynyń jabylýyna baılanysty saltanatty shara bolady.
Esterińizge sala ketelik, maýsym basynda «Qaısar» komandasynyń aldyna úzdik bestikte bolý mindeti qoıyldy. Sondaı-aq oblys basshylyǵynyń qoldaýymen «Qaısar» oıynshylary Reseıdiń Qazan qalasyndaǵy fýtboldan álem birinshiligindegi kezekti kezdesýdi tamashalap qaıtty.
Ótken aptada el birinshiligi máresine jetip, «Qaısar» syrt alańda «Aqtóbe» komandasyn 2:0 esebimen tize búktirip qaıtty
