«Qaısardyń» bapkeri «Ertisten» jeńilgen jaǵdaıda ornynan ketedi
QYZYLORDA. QazAqparat - Fýtboldan el birinshiligindegi tórt týrda nebári bir upaı alyp, qarsylastar qaqpasyna jalǵyz dop engizgen Qyzylordanyń «Qaısar» komandasynyń basshylyǵy men bapkerler quramy jergilikti jankúıerlermen kezdesti, dep habarlaıdy QazAqparat tilshisi.
Komandanyń el birinshiligin sátsiz bastaýy qyzylordalyq jankúıerlerdiń narazylyǵyn týdyrdy. Jankúıerler bolgar mamany Stoıcho Mladenov bas bapkerlik qyzmetten ketýin talap etip júrgeni belgili. Degenmen komanda basshylyǵy «Qaısardyń» mundaı sátsiz qadamyn ýaqytsha dep baǵalap, bolgarlyq bapkerge senim artyp otyr. Júzdesý barysynda qos tarap ta óz oılaryn ashyq jetkizdi. Bas bapker Stoıcho Mladenov komandanyń jeńiske jete almaý sebebin sátsizdik retinde sanaıtynyn aıtady.
«Qaısar» komandasynyń óz deńgeıinde oıyn kórsettýine barlyq jaǵdaı jasalǵan. Oblys basshysy bizdiń klýbqa árdaıym qoldaý kórsetip keledi. Sportta barlyq jaǵdaı kezdesedi. Jeńis te, jeńilis te oryn alady. Men shákirtterimmen jetistikke jetýdi kózdeımin. Osy senbide óz alańymyzda Pavlodardyń «Ertisin» qabyldaımyz. Sol oıynda bizdiń fýtbolshylar bar kúsh-jigerin salatyn bolady. Eger komanda upaı joǵaltsa, óz ornymdy bosatýǵa ázirmin», - dedi Stoıcho Mladenov.
Bıyl komandanyń jyly bas quryltaıshysy - oblys basshylyǵy «Qaısardyń» aldyna úzdik bestikte bolýdy mindettegen bolatyn. Sátsiz oıyndarynan keıin «Qaısardyń bas bapkeri ornynan kete me» degen saýalǵa budan buryn oblystyq dene shynyqtyrý jáne sport basqarmasynyń basshysy Oljas Ákimov te jaýap bergen edi.
Ádilet QAŃTARBAEV
