«Qaısar» úsh oıyn qatarynan gol soǵa almaı júr
QYZYLORDA. QazAqparat - Qyzylordanyń «Qaısary» Túrkııadaǵy oqý-jattyǵý jıyny barysynda «Tsarsko Selo» komandasymen kezdesti, dep habarlaıdy QazAqparat tilshisi.
Atalmysh komanda 2007 jyly «Sofııa» ataýymen qurylǵan. Búginge deıin Bolgarııanyń joǵary lıgasynda oıyn kórsetip kórgen joq. Byltyr ekinshi lıgada úshinshi oryn alǵan. Bıyl ekinshi lıgada kósh bastap keledi. Komanda bapkeri - Nıkolaı Spasov byltyr Petropavldyń «Qyzyljar» klýbyna bapkerlik etti.
Búgingi kezdesýde birinshi kezeńde «Qaısar» komandasynyń quramynda Marsel Islamqulov qaqpada turdy. Qorǵanys shebinde Abdel Azız Lamanj, Ivan Sadovnıchıı, Aleksandr Marochkın, Іlııas Ámirseıitov shyqsa, jartylaı qorǵanysta Ashat Taǵybergen, Mark Gýrman, Tıgran Barsegıan, Djon Djoshýa, Dýman Nárzildaev boı kórsetti. Shabýylda Igor Zenkovıch ornlasty.
Eki komanda arasyndaǵy kezdesý tartysty órbidi. Áıtkenmen, dop alań ortasynda kóbirek júrdi. Qos ujym da gol soǵatyn múmkindik izdegen edi. Dese de, oılaǵandary júzege aspaı jatty.
Ekinshi kezeńde qaqpashydan ózge oıynshylar almasty. Qorǵanys shebi Marın Orshýlıch, Valentın Chýreev, Oljas Altaev, Ivan Grafqa senip tapsyryldy. Jartylaı qorǵanysta Bekzat Qurmanbekuly, Maqsat Baıjanov, Marat Haırýllın, Karlos Olıveıra, Kýlo Mbombo boı kórsetse, shabýylǵa Bratıslav Pýnoshevats shyqty.
Bul kezeńde de eki komanda oıynshylary bir-biriniń qatelikterin izdeýge tyrysty. Oıyn taǵdyryn sheshken jalǵyz gol 73-mınýtta soǵyldy. Ókinishke qaraı, bul gol bolgar komandasynyń enshisine jazyldy. «Qaısar» osylaısha «Tsarsko Selo» klýbyna 0:1 esebimen jol berdi. Qyzylordalyq klýb úsh oıyn qatarynan gol soǵa almaı keledi.
«Qaısar» búgin taǵy bir joldastyq kezdesý ótkizedi. Bul joly Grýzııanyń VIT-«Djordjııa» komandasymen sheberlik baıqasady. Oıyn Astana ýaqytymen 20.00-de bastalady.
«Qaısar» budan buryn Ýkraınanyń «Desna» jáne Reseıdiń «Krylıa Sovetov» komandalarynan jeńilip qalǵan edi.
