«Qaısar» ýkraınalyq komandadan oısyraı jeńildi
QYZYLORDA. QazAqparat - Qyzylordanyń «Qaısar» fýtbol komandasy Túrkııadaǵy oqý-jattyǵý jıyny barysynda ýkraınalyq «Desnamen» kezdesti, dep habarlaıdy QazAqparat tilshisi.
Ýkraınanyń Chernıgov qalasynyń «Desna» komandasy 1960 jyly qurylǵan. Alǵashqy jyly «Avangard» ataýymen synǵa túsken komanda 1961 jyldan beri qazirgi ataýymen oınap keledi. 2018/2019 jylǵy fýtbol maýsymynda tuńǵysh ret Ýkraına Premer-lıgasynda oınaýǵa múmkindik aldy. Qazir altynshy orynda tur.
Búgingi kezdesýde «Qaısar» árbir kezeńge jańa quramdy oıynǵa qosty. Alǵashqy kezeńde Aleksandr Grıgorenko, Kýle Mbombo, Abdel Azız Lamanj, Marın Orshýlıch, Aleksandr Marochkın, Іlııas Ámirseıitov, Ashat Taǵybergen, Dýman Nárzildaev, Djon Djoshýa, Tıgran Barsegıan, Maqsat Baıjanov shyqty.
Qyzylordalyq fýtbolshylar birinshi kezeńde kóp qatelikke boı aldyrdy. Sonyń saldarynan óz qaqpasyna eki gol jiberip aldy. Shabýylǵa shyqqanymen tarazy basyn teńestire alǵan joq.
Bolgar mamany Stoıcho Mladenov ekinshi kezeńge Marsel Islamkulov, Marat Haırýllın, Ivan Graf, Mark Gýrman, Bekzat Qurmanbekuly, Oljas Altaev, Shoqan Abzalov, Karlıtos, Igor Zenkovıch, Bratıslav Pýnoshevats, Valentın Chýreevti qosty. «Qaısar» jigitteri tarazy basyn teńestirýge barynsha umtyldy. Áıtse de oǵan ýkraın fýtbolshylary tótep berdi. Aqyry, bizdiń jigitter óz qaqpasynan taǵy da eki dop alyp shyǵýǵa májbúr boldy. Kezdesý 0:4 esebimen «Qaısardyń» jeńilisimen aıaqtaldy.
«Qaısar» budan buryn reseılik «Baltıkadan» jeńilip qalǵan edi.
«Qaısar» endi Túrkııada ótip jatqan ekinshi oqý-jattyǵý jıyny barysynda bes oıyn ótkizedi. Aldymen 12 aqpanda Reseıdiń «Krylıa Sovetov» (Samara) komandasymen kezdesse, 15 aqpanda Bolgarııanyń «Tsarsko Selo» jáne Grýzııanyń «Vıt» komandalarymen sheberlik baıqasady. Sondaı-aq, 18 aqpanda Grýzııanyń «Sabýrtalo», 21 aqpanda Túrikmenstannyń «Altyn Asyr» komandalarymen sheberlik baıqasady. Qyzylordalyq fýtbolshylar 22 aqpanǵa deıin Túrkııada jańa maýsymǵa daıyndyq júrgizedi.
