«Qaısar» syrt alańda «Tobyldy» jeńip ketti

ASTANA. KAZINFORM — Búgin, 1 maýsymda fýtboldan Qazaqstan Premer-lıgasynyń onynshy týry bastalady.

Atalǵan týrdyń alǵashqy oıyny «Tobyl» (Qostanaı) men «Qaısar» (Qyzylorda) komandalary arasynda ótti.

Kezdesý barysynda qarsylastar birden shabýylǵa kóshti. Dese de birinshi kezeńde tablodaǵy esepke ózgeris engen joq.

Ekinshi kezeńde «Qaısar» sapynan Valerıı Gromyko 52-mınýtta esep ashty.

Bul — belarýs fýtbolshysynyń qyzylordalyq klýb sapyndaǵy úshinshi goly. 

Odan keıin 76-mınýtta qostanaılyq komandadan Islam Chesnokov tarazy basyn teńestirdi.

Oıynnyń 92-mınýtynda «Qaısar» shabýylshysy Shohnazar Norbekov jeńis golyn soǵyp ketti. 

Osylaısha qyzylordalyq klýb qarsylasyn 2:1 esebimen jeńip, týrnır kestesinde segizinshi orynǵa kóterildi.

Nátıjesinde olar jeńilissiz serııany alty oıynǵa jetkizdi.

Dál qazir «Ordabasy» (Shymkent) men «Jetisý» (Taldyqorǵan) kezdesýde. 

Al 2 maýsymda «Turan» (Túrkistan) men «Aqtóbe», «Elimaı» (Semeı) men «Qyzyljar» (Petropavl), «Qaırat» (Almaty) pen «Shahter» (Qaraǵandy), «Jeńis» (Astana) pen «Atyraý» komandalary oınaıdy.