«Qaısar» reseılik komandadan basym tústi
QYZYLORDA. QazAqparat - Qyzylordanyń «Qaısary» Túrkııadaǵy oqý-jattyǵý jıyny barysynda Reseıdiń «Nıjnıı Novgorod» komandasymen joldastyq kezdesý ótkizdi, dep habarlaıdy QazAqparat tilshisi.
Atalmysh komanda 2015 jyly qurylǵan. 2018 jyldyń 28 maýsymyna deıin «Olımpıets» ataýymen synǵa tústi. Qazir Reseıdiń birinshi lıgasynda oınaıdy. Alǵashqy aınalymdy besinshi orynda aıaqtady. Bapkeri - Dmıtrıı Cheryshev esimi qazaqstandyq jankúıerlerge jaqsy tanys. Ol 2014-2015 jyldary Pavlodardyń «Ertis» komandasyna bapkerlik jasady. Eki komanda byltyr da Túrkııada joldastyq kezdesý ótkizgen edi. Bul kezdesýde reseılikter «Qaısardan» 4:2 esebimen basym tústi.
Búgingi kezdesý qyzylordalyq klýb birinshi kezeńde qaqpaǵa Aleksandr Grıgorenko, qorǵanysqa Abdel Azız Lamanj, Marın Orshýlıch, Ivan Sadovnıchıı, Valentın Chýreevoınady. Sondaı-aq, jartylaı qorǵanysta Dýman Nárzildaev, Bekzat Qurmanbekuly, Djon Djoshýa, Maqsat Baıjanov, Tıgran Barsegıan shyqty. Shabýylda Bratıslav Pýnoshevats boldy.
Oıyn qyzylordalyq klýb úshin sátti bastaldy. Kezdesýdiń 11-mınýtynda komanda kapıtany Maqsat Baıjanov áriptesi Bratıslav Pýnoshevatsqa ádemi pas berdi. Ony serb shabýylshysy golǵa aınaldyra bildi. Arada bes mınýt ótkende serb fýtbolshysy taǵy da qanjyǵasyn maılady. Oǵan Djon Djoşýa pas shyǵarǵan edi.
Ekinshi kezeńde qaqpaǵa Marsel Islamqulov shyqty. Qorǵanysta Marın Orshýlıchten basqasynyń barlyǵy aýysty. Olardyń ornyna Oljas Altaev, Ivan Graf, Іlııas Ámirseıitov shyqty. Al jartylaı qorǵanysta Ashat Taǵybergen, Igor Zenkovıch, Mark Gýrman oınasa shabýyl shebinde Kýle Mvombo, Shoqan Abzalov oıyn kórsetti. Oǵan qosa qazir «Qaısardyń» synaǵynda júrgen portýgal shabýylshysy Karlıtos Olıveıra qosyldy. Ekinshi kezeńde oıyn esebi ózgergen joq. «Qaısar» atalmysh qarsylasyn 2:0 esebimen jeńdi.
Oqý-jattyǵý jıynynda «Qaısar» birneshe joldastyq kezdesý ótkizýdi josparlap otyr. Atap aıtqanda, Reseıdiń «Krylıa Sovetov» (Samara), Ýkraınanyń «Desna», Bolgarııanyń «Tsarsko Selo», Grýzııanyń «Vıt», «Sabýrtalo», Túrkimenstannyń «Altyn Asyr» komandalarymen sheberlik baıqasady. Komanda 22 aqpanǵa deıin Túrkııada jańa maýsymǵa ázirligin júrgizedi.
Budan buryn «Qaısar» ekinshi oqý-jattyǵý jıynyn bastaǵanyn habarlaǵan edik.
