«Qaısar» reseılik «Baltıkadan» jeńilip qaldy
QYZYLORDA. QazAqparat - Qyzylordanyń «Qaısary» búgin Túrkııada joldastyq kezdesý ótkizdi. Bul joly olar Reseıdiń Kalınıngrad qalasynyń «Baltıka» komandasymen sheberlik baıqasty, dep habarlaıdy QazAqparat tilshisi.
Atalmysh kezdesýde qyzylordalyq klýbtyń bas bapkeri Stoıcho Mladenov birinshi kezeńde qaqpashy Marsel Islamqulov, qorǵaýshylar - Іlııas Ámirseıitov, Ivan Graf, Ivan Sadovnıchıı, Oljas Altaev, jartylaı qorǵaýshylar - Dýman Nárzildaev, Mark Gýrman, Ashat Taǵybergen, shabýylshylar - Tıgran Barsegıan, Djon Djoshýa, Igor Zenkovıchti shyǵardy.
Birinshi kezeńde reseılik komanda gol soqty (Ilıa Kýzmıchev). Eki komanda tarapynan da esepti ózgertetin sátter bolǵan edi. Degenmen, ony tıimdi paıdalana almady.
Ekinshi kezeńde «Qaısar» quramynda ózgerister oryn aldy. Endi qaqpaǵa Aleksandr Grıgorenko ıelik etse, qorǵanys shebine Abdel Lamanj, Ivan Graf, Marın Orshýlıch, Valentın Chýreev jaýap berdi. Al jartylaı qorǵanysta Bekzat Qurmanbekuly, Maqsat Baıjanov, Kýle Mbombo, Marat Haırýllın, Karlıtos boı kórsetse, shabýylǵa Bratıslav Pýnoshevats shyqty. Bul kezeńde qyzylordalyq fýtbolshylar tarazy basyn teńestirdi. Odan keıin esepti ulǵaıtýǵa shamasy kelgen joq. Esesine 81-mınýtta óz aıyp alańynda tártip buzdy. Ony «Baltıka» sapynan Igor Portnıagın múltiksiz oryndady. Osylaısha «Qaısar» búgingi qarsylasynan 1:2 esebimen jeńilip qaldy.
Budan buryn qyzylordalyq komanda Reseıdiń «Nıjnıı Novgorod» klýbynan 2:0 esebimen basym túsken edi.
«Qaısar» endi Túrkııada ótip jatqan ekinshi oqý-jattyǵý jıyny barysynda bes oıyn ótkizedi. Aldymen 9 aqpanda Ýkraınanyń «Desna», 12 aqpanda Reseıdiń «Krylıa Sovetov» (Samara), 15 aqpanda Bolgarııanyń «Tsarsko Selo» jáne Grýzııanyń «Vıt» komandalarymen kezdesedi. Sondaı-aq, 18 aqpanda Grýzııanyń «Sabýrtalo», 21 aqpanda Túrikmenstannyń «Altyn Asyr» komandalarymen sheberlik baıqasady. Komanda 22 aqpanǵa deıin Túrkııada jańa maýsymǵa ázirligin júrgizedi.
