«Qaısar» óz alańynda Semeıdiń «Elimaıyn» súrindirdi
ASTANA. KAZINFORM — Fýtboldan Qazaqstan Premer-lıgasynyń HІV týrynda qyzylordalyq «Qaısar» óz alańynda Semeıdiń «Elimaıyn» súrindirdi.
Bıylǵy birinshilikti sátsiz bastaǵan qyzylordalyq klýb sońǵy týrlarda jankúıer kóńilinen shyǵyp keledi. Sońǵy on týrda nebári bir márte jeńilistiń aşy dámin tatty.
Esesine semeılik komanda ala-qula oıyn kórsetip júr. Keıingi alty kezdesýde bes márte teń túsken edi.
Búgingi oıynda semeılik klýb alǵashqy bolyp esep ashty.
Oıynnyń 13-mınýtynda olardyń qatarynan Alvesh Dos Santos Rodjerıo mergendik tanytyp, óz komandasyn alǵa shyǵardy.
Al ekinshi kezeńde 56-mınýtta «Qaısar» sapynan Aıbar Jaqsylyqov penaltıden tarazy basyn teńestirse, 95-mınýtta Goran Mıloıko jeńis golyn soqty.
Aıta ketsek, 61-mınýtta qyzylordalyq klýbtan Toqtar Jańǵylyshbaı qyzyl qaǵaz alyp, alańnan qýyldy.
Osylaısha on oıynshymen qalsa da «Qaısar» qarsylasyn 2:1 esebimen tize búktirdi.
Eske salsaq, atalǵan týrda 13 shildede «Shahter» men «Jetisý» teń túsken edi.
Endi 14 shildede 18:00–de «Qaırat» (Almaty) pen «Jeńis» (Astana) sheberlik baıqasady.
Sondaı-aq «Ordabasy», «Aqtóbe», «Tobyl» komandalarynyń eýrokýbokta oınaýyna baılanysty atalǵan týrdaǵy olardyń qatysýymen ótetin birqatar oıyndar keıinge shegerildi.
