«Qaısar» quramy serbııalyq oıynshymen tolyqty
QYZYLORDA. QazAqparat - Qyzylordanyń «Qaısar» fýtbol klýby jańa oıynshymen tolyqty. Komandaǵa serbııalyq shabýylshy Bratıslav Pýnoshevats keldi, dep habarlaıdy QazAqparat tilshisi.
Bratıslav Pýnoshevats 1987 jyldyń 9 shildesinde Serbııanyń Krýshevats qalasynda dúnıege kelgen. Ol óz eliniń «Kopaonık» jáne «Partızan» klýbtarynyń jastar quramynda úlken fýtbolǵa qadam basqan. 2005 jyly kásibı karerasyn «Napredak» komandasynda bastady. Atalmysh klýbta 2010 jylǵa deıin oınap, 64 oıynda 13 gol soqty. 2011-2013 jyldarda Rýmynııanyń «Otselýl» klýbynda dop teýip, odan keıin sol eldiń «Tyrgý-Mýresh», Japonııanyń «Avıspa Fýkýoka», Serbııanyń «Radnıchkı», Vengrııanyń «Gonved» jáne «Bekeshchaba» komandalarynyń jeıdesin kıdi.
Ústimizdegi jyldyń basynda Petropavldyń «Qyzyljar» klýbymen kelisimshartqa qol qoıdy. Bıyl ol komanda sapynda 15 oıynda 4 gol soqty.
«Jaqynda el birinshiliginde transferlik kezeń bastaldy. Biz komanda quramyn kúsheıtýge mán berip otyrmyz. Qazaqstandyq jáne sheteldik oıynshylardy komanda quramyna tartamyz», - dedi «Qaısar» komandasynyń bas bapkeri Stoıcho Mladenov.
Aıta ketelik, jaqynda shabýylshy Ioann Arkın «Qaısar» quramynan ketti. Komanda sapynan ketýi múmkin taǵy oıynshylardyń bary aıtylýda. Biraq olardyń esimderi ázirge jarııalanyp otyrǵan joq.
