«Qaısar» Qostanaıda «Tobyldy» jeńip ketti

ASTANA. QazAqparat - Fýtboldan premer-lıga komandalary arasyndaǵy el birinshiliginiń 18-týrynda Qyzylordanyń «Qaısary» Qostanaıda «Tobyldy» jeńip ketti, dep habarlaıdy QazAqparat tilshisi.

Bul kezdesý belgilengen ýaqytynan kesh bastaldy. Qostanaıda nóser jańbyr jaýǵannan keıin tóreshiler osyndaı sheshim qabyldaýǵa májbúr boldy.

Qazir Konferentsııa lıgasynda synǵa túsip jatqan «Tobyl» oıynǵa aralas quramdy shyǵardy. Tájirıbeli fýtbolshylardyń deni qosalqy quramda qaldy.

Kezdesý basynan tartysty órbidi. Nátıjesinde 12-mınýtta qyzylordalyq Órken Mahan qarsylastar qaqpasynan sańylaý taýyp ketti. Alań ıeleri odan keıin tarazy basyn teńestirýge umtylǵanmen tablodaǵy esepke ózgeris engen joq.

Ekinshi kezeńde «Tobyldyń» qosalqy quramda otyrǵan tájirıbeli fýtbolshylary jasyl alańǵa shyqty. Olardyń tarapynan «Qaısar» qaqpasy mańynda jıi shabýyl uıymdastyryldy. Degenmen qaqpadan sańylaý taba almady. Esesine qyzylordalyq klýbtan Vasılıı Sovpel 71-mınýtta esepti ústemeleı tústi.

Osylaısha «Qaısar» qarsylasynan 2:0 esebimen basym túsip, týrnır kestesinde jetinshi orynǵa kóterildi.

Dál qazir «Aqtóbe» men «Qaırat» kezdesýi ótip jatyr. Ázirge birinshi kezeńnen keıin esep - 2:2.

Atalǵan týrda 5 tamyzda «Kaspıı» «Aqsýdy» 3:1 esebimen tize búktirse, «Jetisý» men «Qyzyljar» 1:1, «Shahter» men «Atyraý» 2:2 esebine qanaǵat bildirdi.

Atalǵan týrdaǵy «Ordabasy» (Shymkent) men «Maqtaral» (Túrkistan oblysy) kezdesýin 27 qyrkúıekte ótkizý josparlanyp otyr.

Bul týrdaǵy «Astana» men «Oqjetpes» (Aqmola oblysy) belgisiz merzimge keıinge qaldyrylǵan.