«Qaısar» komandasy jańa maýsymǵa daıyndyǵyn bastady
QYZYLORDA. QazAqparat - Qyzylordanyń «Qaısar» fýtbol klýby Túrkııanyń Antalııa qalasynda alǵashqy oqý-jattyǵý jıynyn bastady, dep habarlaıdy QazAqparat tilshisi.
Atalmysh oqý-jattyǵý jıyny 4-27 qańtar aralyǵynda ótkiziledi. Oǵan komanda quramynda byltyr oıyn kórsetken birqatar fýtbolshylar, jergilikti jastar qatysady. Sondaı-aq, ótken jyly elimizdiń ózge klýbtarynyń quramynda bolǵan birqatar fýtbolshylar «Qaısardyń» synaǵynan ótedi dep josparlanyp otyr. Olardyń qatarynda «Atyraýdan» jartylaı qorǵaýshy Marat Haırýllın, «Jetisýdan» Ivan Sadovnıchıı bar.
Byltyr komanda quramynda bolǵan qaqpashylar - Aleksandr Grıgorenko, Marsel Islamqulov, qorǵaýshylar Abdel Azız Lamanj, Ivan Graf, Aleksandr Marochkın, Valentın Chýreev, Aıbol Jaqaev, Іlııas Ámirseıitov, jartylaı qorǵaýshylar - Mark Gýrman, Dýman Nárzildaev, Ashat Taǵybergen, Maqsat Baıjanov, Valerıı Korobkın, shabýylshylar - Bratıslav Pýnoshevats, Igor Zenkovıch atalmysh oqý-jattyǵý jıynyna attanyp ketti.
Alǵashqy jıynda Ýkraınanyń «Olımpık» komandasymen kezdesedi. Odan keıin 24 qańtarda Ázerbaıjannyń «Sabaıl» komandasymen sheberlik baıqasady.
Budan buryn «Qaısar» komandasynyń bas bapkeri Stoıcho Mladenov bıyl da qyzmetin jalǵastyratynyn habarlaǵan edik. Qyzylordanyń «Qaısar» komandasy 2019 jyly júldeli orynnyń birine iligý maqsatyn kózdep otyr.
