«Qaısar» qolaısyz aýa raıyna baılanysty Túrkııadaǵy oqý-jattyǵýyn ótkize almady
QYZYLORDA. QazAqparat - Qyzylordanyń «Qaısary» búgin Túrkııadaǵy aýa-raıynyń qolaısyz bolýyna baılanysty oqý-jattyǵý jasaı almady. Oǵan qatty daýyldyń turýy sebep bolǵan, dep habarlaıdy QazAqparat tilshisi.
Klýbtyń baspasóz qyzmetiniń habarlaýynsha, tańerteńgi ýaqytta qatty daýyl turǵan jáne jańbyr jaýǵan. Soǵan baılanysty daıyndyq keıinge qaldyryldy. Bapkerler quramy oqý-jattyǵýdy trenajerlik zalda uıymdastyrdy.
Esterińizge sala ketelik, «Qaısar» Túrkııanyń Antalııa qalasynda 3-23 qańtar aralyǵynda oqý-jattyǵý jıynyn ótkizedi. Qyzylordalyq klýb Antalııada eki joldastyq kezdesý ótkizýdi josparlap otyr. Ázirge qarsylastar anyqtalýda.
Oqý-jattyǵý jıynyna synaqqa birqatar fýtbolshylar keldi. Olardyń qatarynda Eldos Ahmetov, Baǵdat Qaıyrov, Qýanysh Qalmuratov bar.
