«Qaısar» fýtbolshylary ýkraınalyq komandadan jeńilip qaldy
QYZYLORDA. QazAqparat - Qyzylordanyń «Qaısary» Túrkııanyń Antalııa qalasynda Ýkraınanyń «Olımpık» komandasymen joldastyq kezdesý ótkizdi, dep habarlaıdy QazAqparat tilshisi.
«Olımpık» komandasy 2001 jyly qurylǵan. Ýkraınanyń Donetsk qalasy atynan synǵa túsedi. Alǵashqyda sol eldiń fýtboldan birinshi jáne ekinshi lıgasynda synǵa túsken atalmysh klýb sońǵy bes jyldan beri turaqty túrde Premer-lıgada úzdikter qatarynda synǵa túsip keledi. 2016-2017 jylǵy fýtbol kezeńinde tórtinshi oryn aldy. Sonyń nátıjesinde Eýropa lıgasy úshinshi irikteý kezeńinde Grekııanyń PAOK klýbymen kezdesti. Óz alańynda 1:1 esebimen teń túsken ýkraın fýtbolshylary syrt alańda qarsylastaryna 0:2 esebimen ese jiberip qoıdy.
«Qaısardyń» bas bapkeri Stoıcho Mladenov búgingi kezdesý barysynda aralas quramdy jasyl alańǵa shyǵardy. Birinshi kezeńde qaqpany Aleksandr Grıgorenko kúzetse, Aıbol Jahaev, Abdel Lamanj, Ivan Sadovnıchıı, Іlııas Ámirseıitov sekildi qorǵaýshylar oǵan kómek berdi. Jartylaı qorǵanysta Bekzat Kurmanbekuly, Ashat Taǵybergen, Maqsat Baıjanov syndy jigitter oıyn kórsetip, shabýylǵa Djon Djoshýa, Órken Mahan men Kýle Mbomba shyqty.
Esepti alǵash «Olımpık» fýtbolshylary ashty. Oıynnyń 17-mınýtta olardyń sapynan Maksım Degtıarev «Qaısar» qaqpasynan sańylaý taýyp ketti. Al 21-mınýtta qyzylordalyq klýbtyń jartylaı qorǵaýshysy Ashat Taǵybergen penaltıden tarazy basyn teńestirdi. Kezdesýdiń 28-mınýtynda ýkraınalyq Ivan Sondeı óz komandasyn alǵa shyǵardy.
Ekinshi kezeńde «Qaısar» qaqpasyn jergilikti fýtboldyń túlegi Nurymjan Salaıdın qorǵasa, qorǵanysta Valentın Chýreev, Ivan Graf, Marın Orshýlıch, Oljas Altaev qyzmet kórsetti. Jartylaı qorǵanysta Shoqan Abzalov, Mark Gýrman, Dýman Nárzildaev, Marat Haırýllın, Igor Zenkovıch bolsa, shabýyl shebinde Bratıslav Pýnoshevats boı kórsetti.
Ekinshi kezeńde qyzylordalyq fýtbolshylar tarazy basyn teńestirýge umtyldy. Degenmen dittegen maqsatyna jete alǵan joq. Esesine óz qaqpasyna gol jiberip aldy. Ony 67-mınýtta «Olımpık» oıynshysy Anton Shınder oryndady. Kezdesý 3:1 esebimen «Olımpık» jeńisimen aıaqtaldy.
«Qaısar» qańtardyń alǵashqy kúnderinen bastaý alǵan oqý-jattyǵý jıynynyn alǵashqy kúnderi klýb basshylyǵy jartylaı qorǵaýshy Marat Haırýllın, qorǵaýshy Ivan Sadovnıchıı kelisim shartqa otyrdy. Sondaı-aq, byltyrǵy jyly oıyn kórsetken 15 fýtbolshymen kelisim-shart merzimin uzartty. Odan keıin komanda quramyna horvatııalyq qorǵaýshy Marın Orshýlıch qosyldy. Arýba quramasynyń jartylaı qorǵaýshysy Djon Djoshýa bıyl «Qaısar» quramyn tolyqtyrdy. Al 22 qańtarda «Qaısar» kongolyq Kýle Mbombomen kelisimshartqa otyrdy.
Endi qyzylordalyq ujym 24 qańtarda Ázerbaıjannyń «Sabaıl» komandasymen sheberlik baıqasady.
Foto: www.fckaysar.kz
