«Qaısar» fýtbol klýbyna 50 jyl toldy
QYZYLORDA. QazAqparat - Qyzylordanyń «Qaısar» komandasy 2019 jyly júldeli orynnyń birine iligý maqsatyn aldyna qoıyp otyr. Atalmysh klýbtyń qurylǵanyna 50 jyl tolýyna oraı ótkizilgen saltanatty shara barysynda Qyzylorda oblysynyń ákimi Qyrymbek Kósherbaev komandaǵa osyndaı mindet júktedi, dep habarlaıdy QazAqparat tilshisi.
Syr óńiriniń namysyn qorǵaıtyn komanda 1968 jyly «Volna» degen ataýmen alǵashqy resmı oıynyn ótkizdi. Odan keıingi jyldarda «Avtomobılıst», «Orbıta», «Melıorator» ataýymen jankúıer esinde qaldy. 1990 jyldan beri qazirgi ataýymen synǵa túsip keledi. Búgingi kúnge deıin qol jetkizgen eń joǵarǵy jetistigi - 1999 jylǵy Qazaqstan kýbogy.
Sondaı-aq, 1998, 2008 jyldarda tórtinshi orynǵa turaqtady.
«Qazirgi kúni «Qaısar» elimizdegi belgili klýbtardyń biri sanalady. Bıyl komanda aldyna besinshi oryn alý mindeti qoıylǵan. Jerlesterimiz sol mindettiń údesinen shyqty. Keler jyly komanda aldyna eýrokýbok oıyndaryna qatysý joldamasyna ıe bolý mindetin qoıyp otyrmyz. Júldeger klýbtar qatarynan kóremiz degen úmittemiz. Bul maqsatta olarǵa barlyq jaǵdaı jasalady. Komandanyń qarjylyq jaǵdaıyn bıylǵydan da kóbeıtýge mán berip otyrmyz. Oǵan qosa Ǵ.Muratbaev atyndaǵy ortalyq stadıon zamanaýı talaptarǵa saı jańǵyrtylyp jatyr», - dedi oblys ákimi Qyrymbek Kósherbaev.
Saltanatty shara barysynda komanda quramynda ár jyldarda oıyn kórsetken fýtbolshylarǵa qurmet kórsetildi. Olarǵa estelik syılyqtar tabys etildi.
Sondaı-aq, búgin «Qaısardyń» 1999 jyly Qazaqstan kýbogyn jeńip alǵan juldyzdy quramy men ár jyldarda komanda jeıdesin kıgen oıynshylar joldastyq kezdesý ótkizdi.
Esterińizge sala ketelik, budan buryn «Qaısardyń» bas bapkeri Stoıcho Mladenov 2019 jyly da qyzmetin jalǵastyratynyn habarlaǵan edik.
