«Qaısar» fýtbol klýby aýktsıonǵa shyǵaryldy
NUR-SULTAN.QazAqparat – Qyzylordanyń «Qaısar» fýtbol klýby 104 mıllıon teńgege aýktsıonǵa qoıyldy, dep habarlaıdy QazAqparat Elektrondyq saýda-sattyqtar tiziliminiń portalyna silteme jasap.
Bıylǵy fýtbol maýsymyn sátsiz aıaqtaǵan «Qaısar» komandasy satýǵa shyǵaryldy. Klýb Qyzylorda oblysynyń dene shynyqtyrý jáne sport basqarmasynyń menshiginde. Quryltaıshysy – Qyzylorda oblysynyń qarjy basqarmasy.
«Saýda-sattyq túri: satyp alý quqyǵymen senimgerlik basqarýǵa beriledi. Bastapqy baǵasy – 104 mıllıon 223 myń teńge, kepildi jarna – 15 mıllıon 633 myń 450 teńge, aýdarylǵan úles – 3 mıllıon 546 myń 81 teńge», - delingen memlekettik múlik tiziminiń elektrondyq saýda alańynda shyǵarylǵan aqparatta.
Birinshi tender osy jyldyń 6 qazanynda ótýi kerek edi. Biraq aýktsıonǵa qatysýshylardan ótinimi túspegen.
