«Qaısar» fýtbol klýbyn burynǵy bas bapkerlerdiń biri jattyqtyrýy múmkin be
QYZYLORDA. KAZINFORM – Qyzylorda oblysy «Qaısar» fýtbol klýbynyń basqarýshy dırektory Baqytjan Pazylhaıyr komandanyń bas bapkerligine qatysty túrli aqparatqa oraı túsindirme berdi.
- Qazir biz úshin eń bastysy – aldaǵy oıyndarǵa komandany jaqsy daıyndaý. Búginde komandany bas bapkerdiń mindetin atqarýshy, UEFA Pro sanatyndaǵy maman Dmıtrıı Karpov daıyndap jatyr. Oǵan jergilikti, tájirıbeli maman, buǵan deıin «Qaısardy» jattyqtyrǵan Sultan Ábildaev kómektesip júr. Árıne, ártúrli nusqalardy qarastyramyz. Sheteldik mamandar da bar. Biraq dál qazir asyǵys sheshim qabyldaýdyń qajeti joq dep oılaımyz. Qazirgi bapkerler shtabyna senim bar, olar komandany aldaǵy oıyndarǵa daıyndap jatyr, - dedi ol.
Klýbtyń basqarýshy dırektory «Qaısardy» buǵan deıin jattyqtyrǵan burynǵy bas bapkerlerdiń eshqaısysynyń kandıdatýrasy qarastyrylyp jatpaǵanyn málimdedi.
Eske salaıyq, jýyrda ǵana klýbtyń bas bapkeri Andreı Ferapontov óz ótinishi negizinde qyzmetinen ketti.
Al Baqytjan Pazylhaıyr buǵan deıin Qazaqstan fýtbol federatsııasynyń atqarýshy dırektory boldy.
Sondaı-aq Kásibı klýbtar arasyndaǵy jarystardy uıymdastyrý dırektsııasyn basqardy.
