«Qaısar» FK «№1 jankúıerine» alǵys aıtty
QYZYLORDA. QazAqparat - Qyzylorda oblysynyń ákimi Qyrymbek Kósherbaev «Qaısar» fýtbol klýbynyń basshylyǵy jáne oıynshylarymen kezdesti, dep habarlaıdy QazAqparat tilshisi.
«Qaısar» FK jankúıerleriniń qýanyshyna oraı, osy jyly komanda joǵary nátıjege qol jetkize alatynyn dáleldedi. Bıyl ortalyq stadıonda 3500 oryndyq qosalqy alań paıdalanýǵa berildi, al keler jyly ortalyq stadıon qaıta jańǵyrtýdan ótkizilmekshi.
«Qyzylordanyń 200 jyldyq mereıtoıy jáne klýbtyń 50 jyldyǵy qarsańynda oıynshylarymyz barlyq Qyzylorda oblysynyń fýtbol súıer qaýymyna syı jasap, úzdik bestiktiń qatarynan kórinedi degen senimdemiz», - dedi ákim kezdesýde.
Sondaı-aq, Qyrymbek Kósherbaev «Qaısar» fýtbol klýbynyń jattyqtyrýshy quramy men basshylaryn Premer-lıga chempıonatynda tabysty daıyndyqtary úshin alǵys hattarmen marapattady.
Al, óz kezeginde «Qaısar» FK bas jattyqtyrýshysy Stoıcho Mladenov jáne komanda kapıtany Maqsat Baıjanov ózderiniń «№1 jankúıeriniń» qoldaýy men senim bildirgenine alǵys aıtty.
Esterińizge sala ketsek, «Qaısarlyqtar» 32 týr boıynsha 10 jeńiske qol jetkizip, 9 kezdesýdi teńbe-teń aıaqtap, 13 oıynda qarsylastaryna jol berdi.
