Qaısar arý Qaıyrgúl: agentýra – qaýip-qaterdiń ortasy
PAVLODAR. KAZINFORM - Uıymdasqan qylmyspen kúres baǵyty – qaýip-qaterdiń ortasy. Asa mańyzdy ister jónindegi aǵa jedel ýákil, polıtsııa podpolkovnıgi Qaıyrgúl Ońalbaevanyń bul salada eńbek etip kele jatqanyna 20 jylǵa jýyq ýaqyt ótken.
Qaıyrgúl Saılaýqyzynyń polıtsııa pogonyn taqqanyna bıyl 19 jyldan asty. Osy ýaqyt ishinde ol qatardaǵy qyzmetkerden tájirıbeli aǵa jedel ýákilge deıingi joldan ótti. Pavlodar óńirindegi qylmystyq toptardyń jolyn kesý, zańsyz áreketterdi áshkereleý men qoǵamdyq qaýipsizdikti saqtaý jolynda keıipkerimiz talaı kúrdeli tapsyrmalardy oryndady. Óńirlik uıymdasqan qylmysqa qarsy kúres basqarmasynda jumys isteý tek fızıkalyq daıyndyqty emes, eń aldymen analıtıkalyq oılaýdy jáne psıhologııalyq tózimdilikti qajet etedi. Onyń aıtýynsha, bul salada áıel adamǵa tán qyraǵylyq pen ıntýıtsııa kóbine sheshýshi ról atqarady.
- Ózim Maı aýdanynyń týmasymyn. Mektepti Semeı óńirinde oqyp, Almatydaǵy qazaq qyzdar pedagogıkalyq ınstıtýtyn támamdadym. Kishkene kezimnen polıtsııa kıimin kıgenderge qarap qatty qyzyǵatynmyn, onyń ústine naǵashym ishki ister organynda qyzmet etti. Sol áser etken bolýy kerek, 2007 jyly Pavlodar qalasyndaǵy Ońtústik polıtsııa bólimine jumysqa turdym. Tez arada tájirıbe jınap, maman bolyp qalyptasýyma kómek kórsetken birinshi basshylarym Q.Túsipbekov pen B.Bólejanovqa, tálimgerlerim Irına Krıvova men Gúlmıra Dáýletshınaǵa, Aıgerim Nurbaıqyzyna alǵysym sheksiz. Polıtsııada áıel nemese er adam dep bóliný joq. Bizde tek ortaq mindet - zańdylyqty qamtamasyz etý jáne azamattardyń tynyshtyǵyn qorǵaý ǵana bar. Kún saıynǵy qıyndyqtarǵa qaramastan, jumysymdy adal atqarýǵa tyrysamyn, - deıdi Qaıyrgúl Ońalbaeva.
Ol qyzmet etetin basqarma qylmysty ashý kezinde qupııa istermen aınalysady. Qylmystyq isti ashý barysynda agentýralyq qyzmetkerler bolady. Ol qupııa aqparat jınaý maqsatynda arnaıy qyzmetter tarapynan qurylatyn, jasyryn jumys isteıtin agentterdiń jıyntyǵy. Qaıyrgúldiń qazirgi mindeti - belgili qylmystyq isterdi tirkeý, olar boıynsha analızder jasaý, qaýlylar shyǵarý, t.b. Qajet bolsa, málimetterdi jınaý úshin óńirlerge shyǵyp, tyńshylyq jasaıdy. Uıymdasqan qylmystyq ister boıynsha óńirde orman aǵashtaryn urlaý, kontrabandalyq ónimderdi tasymaldaý, kásiporyndardyń múlkin tonaý, uıymdasqan qylmystyq toptar qurý sııaqty zań buzýshylyqtar jıi tirkeledi eken.
- Máselen jaqynda Baıanaýyl aýdanynda Qyzyl kitapqa enetin suńqarlardy ustap, shetel asyrmaq bolǵan uıymdasqan qylmystyq top múshelerin quryqtadyq. Kúdiktiler týraly málimetterdi uzaq jınadyq. Nátıjesinde bultartpas aıǵaqtardy tabyldy. Іzdestirý barysynda satý úshin temir torǵa qamap qoıǵan 32 suńqar anyqtaldy. Qylmystyq iske qatysy bar tulǵalar qazir tergelip jatyr. Onyń aldynda birneshe jyl ormandy otap kelgen uıymdasqan qylmystyq top múshelerin anyqtap, qolǵa túsirgen edik. Osyndaı keshendi jumystardyń arqasynda zańǵa tompaq áreket jasaǵandardyń isteri áshkere bolýda, - dep qosty ol.
Aıtýynsha, oblystyq polıtsııa departamentine qarasty uıymdasqan qylmysqa qarsy kúres basqarmasynda 8 jyldan astam ýaqyt eńbek etip keledi. Ujymdaǵy kileń erler arasynda nebári 3 arý jumys isteıtinin, alǵashqyda qıyn bolǵanymen búginde ábden tóselip alǵanyn jetkizdi. Jyldam oılaý, dereý áreket etý, jaǵdaıdy shuǵyl túrde taldaý – kúndelikti talap etiletin daǵdylar. Basqarma qyzmetkerlerinen jospar suralmaıdy, tek kúndelikti shuǵyl tapsyrmalardy mezgilinde sheship otyrýlary qajet.
Basqarma basshylyǵy Qaıyrgúldiń eńbek joly jas mamandarǵa úlgi ekenin aıtady. Jıyrma jylǵa jýyq tájirıbesi bar ofıtser retinde ol óziniń bilimin keıingi tolqynǵa úıretýden jalyqqan emes. Pavlodar oblysynyń krımınogendik ahýalyn jaqsartýǵa qosqan úlesi úshin birneshe márte vedomstvolyq marapattarmen jáne Alǵys hattarmen marapattalǵan. Otbasynda bir ul, bir qyz ósirip otyrǵan ardaqty ana. Qyzmettiń ereksheligine baılanysty bala tárbıesine jete kóńil bóle almadym dep qynjyldy. Áıtse de, balalary mektepte úlgili oqyp, bilim dodalarynda top jaryp júr. Jetkinshekteriniń jetistigi boıyna qýat beredi.
Sóz sońynda Qaıyrgúl Saılaýqyzy polıtsııaǵa kelgenine eshqashan ókinip kórmegenin, kerisinshe mamandyǵyn maqtan tutatynyn jetkizdi. Aıaýly jan barlyq názik jandardy, sonyń ishinde pogon taqqan arýlardy kóktemniń shýaqty merekesimen quttyqtap, baq-bereke tileıdi.