Qaısar Álim «Altyn Juldyz» ıegeri atandy
ALMATY. 1 aqpan. QazAqparat - Búgin Almatyda «Egemen Qazaqstan» gazetiniń tilshisi Qaısar Álim Qazaqstan jýrnalıster akademııasynyń «Altyn Juldyz» jalpyulttyq syılyǵymen marapattaldy. Onda sondaı-aq, «Qazaq» gazeti jáne «Aıqap» jýrnalynyń bas redaktory Qoǵabaı Sársekeev «Jyldyń úzdik basylymy» dıplomyna ıe boldy.
Syılyq ál-Farabı atyndaǵy Qazaq ulttyq ýnıversıtetinde ótken «Qazaq jýrnalıstıkasy tarıhyn zertteý men damý úderisiniń ózekti máseleleri» dep atalatyn halyqaralyq ǵylymı-tájirıbelik konferentsııada tabys etildi. Ol «Qazaq» gazetiniń 100 jyldyǵyna jáne qazaq rýhanııatynyń uly tulǵasy Ahmet Baıtursynovtyń týǵanyna 140 jyl tolýyna oraı uıymdastyrylyp otyr.
Jýrnalıst Qaısar Álim buǵan deıin «Eren eńbegi úshin» medalimen jáne QR Prezıdenti Nursultan Nazarbaevtyń «Alǵys hatymen» marapattalǵan edi. Respýblıkanyń túrli baspalarynan ár jyldary jaryq kórgen 23 kitaptyń avtorynyń 2007 jyly 8 tomdyq shyǵarmalar jınaǵy da oqyrmanǵa jol tartqan bolatyn.
Konferentsııa barysynda Qazaq jýrnalıster odaǵynyń tóraǵasy Seıitqazy Mataev Qoǵabaı Sársekeevke «Qazaq jýrnalıster odaǵynyń» dıplomyn tabys etti. Bas redaktorlar klýbynyń prezıdenti Kenjebolat Joldybaıdyń aıtýynsha, Qoǵabaı Sársekeev keshe Bas redaktorlar klýbynyń 30-shy múshesi bolyp taǵaıyndalǵan kórinedi.
