«Qaısar» aldaǵy maýsymdy jańarǵan stadıonda ótkizedi

Ǵanı Muratbaev atyndaǵy ortalyq stadıon alǵash ret 1968 jyly paıdalanýǵa berilgen. Jergilikti jankúıerlerge jarty ǵasyrdan astam ýaqyt boıy qyzmet kórsetip kele jatqan stadıon odan beri birneshe márte kúrdeli jóndeý men qaıta jańǵyrtýdan ótkizildi. Byltyr atalmysh sporttyq nysandy qaıta jańǵyrtý jumystary bastalǵan edi. Endigi kezekte stadıon barlyq halyqaralyq talaptarǵa saı el ıgiligine beriletin bolady.

«Búginde Qyzylordanyń ortalyq stadıonyn qaıta jańǵyrtý júrgizilýde. Qazirgi ýaqytta ondaǵy jumystyń 60 paıyzǵa jýyǵy bitip qaldy. Sondaı-aq, júgirý joly men alań tolyǵymen aýystyrylmaq. Jospar boıynsha, jóndeý tolyǵymen sáýir aıynyń sońynda nemese mamyrdyń basynda aıaqtalady dep kútilýde. Stadıon paıdalanýǵa berilgen soń, ol jerde «Qaısar» fýtbol komandasy oınaıtyn bolady», - dedi Qyzylorda oblystyq dene shynyqtyrý jáne sport basqarmasynyń basshysy Oljas Akımov.

Ortalyq stadıon 6800 adamǵa laıyqtylǵan. Budan buryn 2001 jáne 2010 jyldary jóndeýden ótkizilgen.

Esterińizge sala ketelik, «Qaısar» qańtardyń alǵashqy kúnderinen Túrkııada birinshi oqý-jattyǵý jıynyn ótkizip qaıtty. Qyzylordanyń «Qaısar» komandasy 2019 jyly júldeli orynnyń birine iligý maqsatyn kózdep otyr.

Klýb basshylyǵy jartylaı qorǵaýshy Marat Haırýllın, qorǵaýshy Ivan Sadovnıchıı kelisimshartqa otyrdy. Sondaı-aq, byltyrǵy jyly oıyn kórsetken 15 fýtbolshymen kelisimshart merzimin uzartty. Odan keıin komanda quramyna horvatııalyq qorǵaýshy Marın Orshýlıch qosyldy.

Arýba quramasynyń jartylaı qorǵaýshysy Djon Djoshýa bıyl «Qaısar» quramyn tolyqtyrdy. Al 22 qańtarda «Qaısar» kongolyq Kýle Mbombomen kelisimshartqa otyrdy. Oǵan komandaǵa «Qaısarǵa» Armenııa quramasynyń fýtbolshysy Tıgran Barsegıan keldi.

«Qaısar» 22 qańtarda Túrkııadaǵy oqý-jattyǵý jıynynda Ýkraınanyń «Olımpık» komandasymen joldastyq kezdesý ótkizip, bul oıynda jerlesterimiz qarsylasynan 1:3 esebimen jeńilip qaldy.