«Qaırattyń» jas aıaqdopshylary Túrkııadaǵy halyqaralyq týrnırde júldeli orynnan úmitti
ALMATY. 30 naýryz. QazAqparat - Búgin Túrkııanyń Alanıa qalasynda ótip jatqan «Túrik demalystary» halyqaralyq týrnıriniń 1998 jylǵy jasóspirimder arasyndaǵy aqtyq oıyndary ótedi.
Onda el namysyn qorǵap jatqan Almaty qalasynyń «Qaırat» fýtbol klýbynyń jas oıynshylary qazir týrnır kestesinde 6 upaımen úshinshi orynda keledi. Endi olar sońǵy oıynyn kósh sońynda kele jatqan Reseıdiń Nahodka qalasynyń «Okean» komandasymen ótkizedi. Al 10 upaımen birinshi orynda turǵan alań qojaıyndarynyń «Alanıaspor» komandasy 8 upaımen ekinshi orynda turǵan Reseıdiń Máskeý oblysynyń «Master-Satýrn» komandasymen kúsh synasady.
Nahodkalyqtar buǵan deıin «Master-Satýrnǵa» 0:3, «Alanıasporǵa» 0:2, Bolgarııanyń Plovdıv qalasynyń «Botev» jáne Grýzııanyń Tbılısı qalasynyń «Lokomotıv» komandalaryna 1:3 esebimen ese jiberip, qorjynyna birde-bir upaı sala almaǵan bolatyn. Al almatylyqtar «Botevti» 1:0, tbılısılikterdi 4:2 etip utyp, máskeýlikterge 1:2, alanıalyqtarǵa 0:2 bolyp utylǵan edi.
