«Qaırattyń» jańa bapkeri resmı túrde tanystyryldy
ALMATY. QazAqparat - Búgin Almatynyń «Qaırat» komandasyna bas bapker taǵaıyndaldy. Komanda basshylyǵy jańa bapkerdi búgin resmı túrde tanystyrdy, dep habarlaıdy QazAqparat tilshisi «Qaırat» fýtbol klýbynyń saıtyna silteme jasap.
Komandanyń baqylaýshy keńesiniń tóraǵasy Qaırat Boranbaev klýbtyń oqý-jattyǵý bazasynyń baspasóz zalynda jańa bapkerlik quramdy tanystyryp ótti. Endigi kezekte almatylyq klýbqa Alekseı
Shpılevskıı bas bapker bolsa, oǵan Hrıstos Papadopoýlos pen Tommı ıAnıgen kómekshilik jasaıtyn boldy.
Komanda aldynda Alekseı Shpılevskıı sóz alyp, olarǵa óz lebizin bildirdi. Sondaı-aq, «Qaırat» basshylary men oıynshylaryn Qazaqstan kýbogy fınalyndaǵy jeńisimen quttyqtady.
Alekseı Shpılevskıı - belarýs mamany, ol buryn nemistiń «Shtýtgart» komandasynda jáne Belarýstiń ár jastaǵy quramalarynda oınaǵan. 2011 jyly Germanııada bapkerlik dárejege qol jetkizdi. Óziniń bapkerlik qyzmetin «Shtýtgart» akademııasynda bastady. 2013-2018 jyldar aralyǵynda «RB Leıptsıg» akademııasynda bapkerlik qyzmet atqardy. Ol sońǵy ýaqytta Belarýstiń Brest qalasynyń «Dınamo» klýby tizginin ustaǵan edi.
Esterińizge sala ketelik, budan buryn «Qaırat» komandasyna jańa bapker taǵaıyndalatyny jóninde habarlaǵan edik.
Sondaı-aq, 24 qarashada «Qaırat» 9-márte Qazaqstan kýbogy ıegeri atandy.
