«Qaırattyń» oıynshysy osymen úshinshi ret úzdik qaqpashy atandy
ALMATY. QazAqparat - «Qaırat» fýtzal klýbynyń qaqpashysy Igıta 2018 jyldyń úzdik qaqpashysy atandy, dep habarlaıdy QazAqparat tilshisi.
Fýtzal jaıynda jazatyn bedeldi Futsal Planet portaly qazylar alqasy men sarapshylardyń pikirlerin eskere kele, Futsal Planet Award baıqaýynyń qorytyndylaryna oraı, álemniń úzdik fýtzalshylaryn anyqtady.
«2018 jyldyń úzdik qaqpashysy» atalymynda Almatynyń «Qaırat» fýtzal klýbynyń jáne Qazaqstan quramasynyń golkıperi Igıta 482 daýys jınap, jeńiske jetti. Onyń basty básekelesi - Ispanııanyń «Inter Movıstar» klýbynyń qaqpashysy Hesýs Herrero Parron 453 daýys jınady.
Igıta buǵan deıin 2015 jáne 2016 jyldary da álemniń úzdik qaqpashysy atanǵan edi.
Eske sala keteıik, bıylǵy ÝEFA Chempıondar lıgasynyń fınaldyq kezeńi 2019 jyldyń sáýirinde Almatydaǵy «Almaty arenada» ótedi. Parket ıeleri, bedeldi týrnırdiń eki dúrkin jeńimpazy «Qaırattan» tys, osy tıtýldyń eki dúrkin ıeleri «Barselona», qazirgi chempıon «Inter Movıstar (ekeýi de Ispanııa klýbtary) jáne Portýgalııanyń «Sportıng» komandalary qatysady.
Avtor: Albert Ahmetov
