«Qaırattyń» bas bapkeri «Tobylmen» ótetin matchqa qatysty pikir bildirdi
NUR-SULTAN. QazAqparat – Qazir elordada «Qaırat» fýtbol klýbynyń quramy jattyǵý ótkizip jatyr. Erteń atalǵan komanda qostanaılyq «Tobyl» fýtbol komandasymen Qazaqstannyń sýperkýbogy úshin talasqa túsedi, dep habarlaıdy QazAqparat tilshisi.
«Sport boıynsha ótetin kez kelgen jarys nemese kýbok óte mańyzdy. Jáne ár saıystyń óz deńgeıi bar. Bizdiń komanda el kýbogy bolsyn, sýperkýbok bolsyn jaýapkershilikpen qaraıdy. Ár jarys - fýtbol komandalary úshin jańa múmkindik. Qarsylasymyz «Tobyl» komandasy jeke quramyn aıtarlyqtaı jasaqtady. Erteń jaqsy bir oıyn bolaıyn dep tur», - dedi «Qaırat» fýtbol komandasynyń bas bapkeri Qurban Berdıev «Astana Arena» kesheninde ótken baspasóz máslıhatynda.
Bas bapkerdiń aıtýynsha, jarysta nátıjemen qatar, jankúıerler úshin áserli oıyn kórsete bilý de mańyzdy.
«Erteńgi oıynǵa kelsek, erteń - fınal. Aldyn ala boljam jasaı almaımyn. Ózderińiz bilesizder, sportta bári múmkin. Álsiz degen komanda aıaq astynan jeńiske jetip jatady. Otandyq jáne sheteldik sportta ondaı mysaldar kóp. Bul jerde 2 komandanyń da múmkindigi teń. Bizdiń maqsat – nátıjeli oıyn kórsetý», - deıdi ol.
Qazir «Qaırat» fýtbol klýbynyń oıynshylary elordadaǵy «Astana Arena» sport kesheninde jattyǵý ótkizip jatyr.
Aıta keteıik, erteń «Qaırat» jáne «Tobyl» fýtbol komandasy Qazaqstannyń sýperkýbogy úshin baq synasady.
Fýtbol oıyny «Astana Arena» sport kesheninde keshki saǵat 19:30-da bastalady.
