«Qaırattyń» jeńisi týraly kıno túsirýge bolady – sport kommentatory
ASTANA. KAZINFORM – Keshe túnde «Qaırat» fýtbol klýby Almatyda tarıhı jetistikke jetip, Chempıondar lıgasynyń negizgi kezeńine joldama aldy. Jibek Joly arnasynyń «Búgin LIVE» baǵdarlamasyna suhbat bergen sport kommentatorlary el fýtbolyndaǵy eleýli oqıǵa týraly aıtyp, oıynnan alǵan áserimen bólisti.
— «Qaırat» fýtbol klýbynyń jeńisi otandastarymyzdy bir serpiltip tastady. Bul jetistikke jankúıerler erekshe qýandy. Onyń ishinde kommentatorlar men sport jýrnalısteri de bar. Ádette mundaı iri týrnırlerdi sheteldik kommentatorlar joǵary deńgeıde júrgizedi. Biz de solarǵa jetýge talpynyp júrmiz. Chempıondar lıgasynyń irikteý kezeńinde tek sheteldik fýtbolshylar ǵana emes, qazaqstandyq oıynshylar da jaqsy óner kórsetti. Ásirese almatylyq klýbtyń akademııasynan shyqqan fýtbolshylardyń alańǵa shyǵýy qýanyshymyzdy eseleı tústi, - deıdi Baqdáýlet Erǵalı.
Al, komentator Ravıl Ashyǵalı bul oıynnyń fýtbol jankúıerleri úshin ǵasyrdan da uzaq ýaqytqa sozylǵanyn aıtty.
— Oıyndy 120 mınýt boıy tamashaladyq. Keshegi tún qazaq fýtbolynyń jankúıerleri men janashyrlary úshin máńgi este qalady. Óıtkeni kópten kútken trıýmfqa qol jetkizdik. 2015 jyly «Astana» fýtbol klýby Chempıondar lıgasynyń toptyq kezeńine joldama alǵan edi. Mine, araǵa 10 jyl salyp «Qaırat» bizge osyndaı qýanyshty qaıta syılady. Almatylyq klýbqa tileýles boldyq. Biraq úmitpen qatar kúdik te júrdi. Qarsylastardyń gol soǵatyn 1-2 múmkindigi boldy. Sol sátte qatty ýaıymdadyq. Abyroı bolǵanda, qaqpamyzdy aman saqtap, toptyq kezeńge óttik. «Qaırattyń» jeńisi tek almatylyq klýbtyń jankúıerleri úshin ǵana emes, kúlli qazaq qaýymy úshin úlken mártebe dep esepteımiz, - deıdi ol.
Stýdııa qonaqtary qaqpashy Temirlan Anarbekovtiń oıynyna da joǵary baǵa berdi.
— Keshe áleýmettik jeliden kórdim. 2002 jyly Oral men Atyraýdyń arqasynda biz Azııadan Eýropa fýtbolyna aýysqan ekenbiz. Al Anarbekov sodan bir jyldan keıin, ıaǵnı 2003 jyly Atyraýda dúnıege kelgen. Ol penaltı serııasynda qaqpany senimdi kúzetip, úsh dopty toıtardy. Fýtboldyń aınalasynda júrgen, túsinetin adamdar qaqpashynyń eńbeginiń qandaı ekenin biledi. Keıbireýler muny sáttilik der. Biraq keı qaqpashylar bir baǵytqa daıyndalyp sekirip jatady. Al Anarbekov sońyna deıin kútip, soqqyny oqyp baryp sekirdi. Sonyń arqasynda keshe qaharman boldy. Bir kúnniń ishinde juldyzǵa aınalyp shyǵa keldi, - deıdi Baqdáýlet Erǵalı.
Sport janashyrlary «Qaırat» oıynshylarynyń komandalyq oıynyn da erekshe atap ótti.
— Anarbekovtiń tarıhı jeńiske qosqan úlesi zor. Biraq jalpy 11 oıynshy da jumylyp, bir jeńnen qol, bir jaǵadan bas shyǵaryp, ádemi oıyn kórsetti. Orazbahtınniń shákirtteri naǵyz komanda bola aldy, - deıdi Ravıl Ashyǵalı.
Komentatorlar almatylyq komandanyń tarıhı jetistigi týraly kıno túsirýge de bolatynyn aıtty.
— Zarýtskıı de birinshi oıynda jaqsy oınady. Ókinishke qaraı jaraqatyna baılanysty qarymta kezdesýge qatysa almady. Bıylǵy maýsymda Anarbekov Qazaqstan Premer-lıgasynda óte az oınady. Keshegi Chempıondar lıgasynda kútpegen jerden negizi quramnan oryn aldy. «Qaırattyń» toptyq kezeńge shyǵýy týraly tipti kıno túsirýge de bolady. Óıtkeni negizgi quramdaǵy kóptegen oıynshy jaraqat alyp qaldy. Mata da aýyr jaraqatyna qaramastan keshe ǵana qatarǵa oralyp, keremet oınady. «Qaırattyń» qaı oıynshysyn alsaq ta — bári naǵyz qaharman, - deıdi olar.
Chempıondar lıgasynyń toptyq kezeńine shyqqany úshin «Qaırat» 18,62 mıllıon eýro tabys tapty.
Stýdııa qonaqtary mundaı tabys ózge komandalarǵa úlken jiger syılaıdy degen úmitte.
— Qazaqstan Premer-lıgasynda negizgi komandaǵa 2 mıllıard teńgege deıin qarjy bólinedi. Al 11 mıllıard degen — odan 6 ese kóp aqsha. Oǵan qosa ár toptaǵy oıyny úshin, jeńisi, jeńilisi nemese teń oıyny úshin de qosymsha qarajat beriledi. Munyń ózi — úlken motıvatsııa. Budan keıin basqa da komandalar óz-ózderin qamshylaıdy dep oılaımyn. Bizde jeke klýbtardan «Tobyldyń» áleýeti bar. Jaqynda bir aqparat estidim. Fýtbol klýby bar kásipkerlerge salyq jaǵynan jeńildikter bolady eken. Eger bul ras bolsa, qalǵan 12 komanda da jeke klýbtar dárejesine ótse eken degen tilegimiz bar, - deıdi fýtbol jankúıerleri.
«Seltık» quramasynyń bas bapkeri Brendan Rodjers jeńilistiń sebebin alańnyń sapasyzdyǵy, joldyń uzaqtyǵymen baılanystyrǵan edi. Alaıda Ravıl Ashyǵalı mundaı ýájben kelispeıdi.
— «Jeńilgen adamnyń sózi kóp» deıdi ǵoı. Biraq biz Brendan Rodjers sııaqty bapkerdi de túsinemiz. Ol Anglııa Premer-lıgasynda birneshe jyl bapkerlik etken, «Lıverpýldi» basqarǵan tájirıbeli maman. Degenmen joldyń uzaqtyǵy men chempıonattaǵy kesteniń qıyndyǵyn syltaý etý — kásibılikke jatpaıdy. Qarsylastardyń da gol salatyn múmkindigi boldy. Sol sátte kásibı deńgeı kórsetý kerek edi. Jalpy, Qazaqstannyń sporttyq ınfraqurylymy áli de damı tússe deımiz. Infraqurylym damysa, akademııalar kóbeıse, qazaq fýtboly kúsheıe beredi. Sonda tek «Qaırat» emes, jyldan-jylǵa basqa da klýbtarymyz Chempıondar lıgasyna joldama alady degen úmitimiz bar, - dep túıindedi ol.