«Qaırattyń» koroldik klýbqa qaýqary jete me
ASTANA. KAZINFORM — Kazinform tilshisi búgin keshke Almatyda ótetin qazaqstandyq «Qaırat» pen Ispanııanyń «Real Madrıd» fýtbol komandalarynyń kezdesýi týraly sarapshylar, jýrnalıster jáne jankúıerlerdiń pikirin oqyrman nazaryna usynady.
Juldyzdar jaýǵan kún
Almatylyq «Qaırat» bıyl dúbirli dodany birinshi irikteý kezeńinen bastaǵan edi. Ádette, mundaı irikteý satysynan negizgi kezeńge deıin jetý qıynǵa soǵady. Qazaqstandyq komanda eshbir irkilgen joq. Jarystyń ár satysynda jankúıerlerge erekshe qýanysh syılady. Aldymen Slovenııanyń «Olımpııasyn» qapy qaldyrǵan klýb odan keıin Fınlıandııanyń KýPS, Slovakııanyń «Slovan» klýbyn artqa tastady. Pleı-off satysynda Shotlandııanyń «Seltıgin» jeńgen olar negizgi kezeńge joldama aldy. Alǵashqy týrda almatylyq klýb syrt alańda «Sportıng» (Portýgalııa) komandasyna 1:4 esebimen jol berdi. Endi «Real Madrıd» (Ispanııa), «Inter» (Italııa), «Arsenal» (Anglııa), «Brıýgge» (Belgııa), «Olımpıakos» (Grekııa), «Pafos» (Kıpr), «Kopengagen» (Danııa) sekildi klýbtarmen sheberlik baıqasady.
— Madrıdtik klýbtyń shabýylshylary qaı komandanyń da qorǵanysyn ábigerge salady. Onda Vınısıýs Jýnıor, Kılıan Mbappe, Gonsalo Garsııa, Braım Dıas, Arda Gıýler sekildi tájirıbeli oıynshylar bar. Meniń oıymsha, shabýyl shebindegi barlyq fýtbolshy óte myqty. Tipti koroldik klýbtaǵy barlyǵyn aıryqsha atap ótýge bolady. Barlyǵy qaqpaǵa qaýip tóndire alady. Biz ıspanııalyq klýbtyń sońǵy bes kezdesýin qarap shyqtyq. Sondaı-aq qurlyqtyq kýboktaǵy PSJ klýbymen oıynynda nazarda ustadyq. «Real Madrıd» turaqtylyǵymen erekshelenedi. Degenmen jeńilisten eshqandaı komanda qashyp qutyla almaıdy. Jas qaqpashymyz Sherhan Qalmyrza Portýgalııanyń «Sportıngimen» kezdesýde ózin jaqsy qyrynan tanytty. Eshqandaı qobaljýdy baıqaǵan joqpyn. Onyń daıyndyǵyn qaqpashylar bapkeri Ilıa ıÝrov jaqsy biledi. Aldaǵy oıynda oǵan áriptesteri kómektesedi degen senimdemin. Ol ózine júktelgen jaýapkershilikti sezinedi. Árbir komandanyń kemshin tusy bolady. Kezdesý aldynda ár qarsylastyń osyndaı osal tusy zerteledi. Biz ataqty klýbpen kezdesýde osyndaı osal tusyn tabýǵa tyrysamyz. Ony erteńgi oıyn barysynan kóresizder. Oıymyz júzege asa ma? Bul saýaldyń jaýaby kezdesýden keıin belgili bolady, — dedi bas bapker Rafael Ýrazbahtın baspasóz máslıhatynda.
Al almatylyq klýb bolsa, qarsylasynyń ataq-abyroıyna qaramastan jaqsy oıyn kórsetýge kúsh salatynyn aıtady.
Almatylyq komandaǵa úmit artamyz
Fýtbolda jankúıerler kútpegen esep tirkelip jatady. Bul kezdesýde «Qaırat» sensatsııa jasaı ala ma? Oǵan koroldik klýb múmkindik bere me? Shyndyǵynda, álemniń kóptegen myqty fýtbolshysyn qataryna qosqan «Real Madrıd» upaı joǵaltyp jatsa, ol fýtbol áleminde erekshe oqıǵa retinde baǵalanatyny daýsyz.
Sport kommentatory Baqdáýlet Erǵalı aldaǵy kezdesýdiń koroldik klýb úshin erekshe ekenin aıtady. Óıtkeni olar Ispanııa prımerasynda «Atletıko Madrıdten» iri eseppen jeńilip qaldy.
— Bul sátsizdigin «Real Madrıd» endi jankúıerleriniń aldynda Chempıondar lıgasyndaǵy «Qaıratpen» kezdesýde «aqtap alýǵa» tyrysady. Árıne, olar óz jankúıerlerin qýantý úshin baryn salady. Kóp gol soqqy jasaýǵa umtylady. Sol úshin negizi quramyn alyp keldi. Bas bapker Havı Alonso birinshi jáne ekinshi quram arasyndaǵy oıynshylarmen ǵana rotatsııa jasaıdy. Kezdesý barysynda olar iri eseppen jeńýge tyrysady degen oıdamyn. Oǵan «Qaırat» fýtbolshylary múmkindik bermeıdi. Odan bólek «Qaırat» syndy komandalarǵa qarsy Kılıan Mbappe, Vınısıýs Jýnıor sııaqty «Altyn dop» nemese jeke marapatqa talasatyn oıynshylar kóbirek gol soǵyp, jeke statıstıkasyn jaqsartyp alǵysy keledi. Degenmen «Real Madrıdtiń» qorǵanysy ázirge qarymta, jyldam shabýylǵa daıyn emes. Ony kóp oıynynan kórip júrmiz. Oń jaq qorǵanysynda Danı Karvahal, Trent Aleksander-Arnold syndy oıynshylary joq, ortada Eder Mılıtan jaraqat alyp qaldy. Sol sebepti «Qaıratta» gol soǵatyn múmkindik bolady degen oıdamyn, — deıdi sport kommentatory.
Onyń aıtýynsha, jankúıerler búgin qyzyqty match tamashalaıdy. Oǵan qos komanda barynsha kúsh salady.
Bási bólek báseke
Tórt jyldaı buryn Chempıondar lıgasynda koroldik klýb óz alańynda Moldovanyń «Sherıf» komandasyna 1:2 esebimen ese jibergen edi. Bul jankúıerler kútpegen jaǵdaı boldy. Óıtkeni, kópshilik koroldik klýbtyń jeńisine kúmándana qoımaǵan edi.
— Men «Qaıratqa» osyndaı jeńis tileımin. Osylaısha aıdy aspanǵa shyǵaryp, jetistikke jetip jatsa, el fýtbolyndaǵy erekshe oqıǵa bolar edi. Olar árbir kezdesýden úlken tájirıbe jınaqtap keledi. Іrikteý kezeńinde tórt komandany artta qaldyryp, negizgi kezeńge deıin jetýi kóp jaıdy aıǵaqtaıdy. Qarsylasynyń eshqaısysy ońaı bolǵan joq. Bapkerlik quram durys taktıkany qoldana bildi. Endi osyndaı sáttilikti aldaǵy oıynnan kútemiz. Komanda quramynda tájirıbeli fýtbolshylar bar. Oǵan qosa bolashaǵynan úlken úmit kúttiretin jastar shoǵyry ósip keledi. Bul olar úshin ózderin jaqsy qyrynan kórsete alatyn úlken múmkindik dep baǵalaımyn. Qazaq fýtbolynyń bolashaǵy qandaı ekenin kórsetse, olarǵa qyzyǵýshylyq bildiretin komandalar sany bolmaıdy. Qysqasy, kim-kim úshin de búgingi oıynnyń bási artyp tur dep aıta alamyn, — deıdi jankúıer Baǵlan Amanjol.
Aıta ketsek, UEFA Chempıondar lıgasy negizgi kezeńiniń 2-týryndaǵy kezdesý búgin, 30 qyrkúıekte saǵat 21:45–te Almatydaǵy Ortalyq stadıonda bastalyp, «Qazaqstan» jáne «Qazsport» telearnasynan tikeleı efırde kórsetiledi.
Bas tóreshi mindeti ıtalııalyq Marko Gýıdaǵa júktelip otyr. Oǵan Djordjıo Perettı men Djýzeppe Perrottı kómektesedi. Tórtinshi tóreshi de sol eldiń ókili — Sımone Sotstsa.