«Qaırattyń» fýtboldan Chempıondar lıgasy negizgi kezeńindegi qarsylastary anyqtaldy

ASTANA. KAZINFORM - Almatylyq «Qaırat» komandasynyń fýtboldan UEFA Chempıondar lıgasy negizgi kezeńindegi qarsylastary anyqtaldy.

Dál qazir Frantsııanyń Monako qalasynda atalǵan týrnırdiń jerebe tartý rásimi boldy.

Almatylyq klýb endi «Real Madrıd» (Ispanııa), «Inter» (Italııa), «Arsenal» (Anglııa), «Brıýgge» (Belgııa), «Sportıng» (Portýgalııa), «Olımpıakos» (Grekııa), «Pafos» (Kıpr), «Kopengagen» (Danııa) klýbtarymen oınaıdy.

Elimizdiń atynan atalǵan týrnırde almatylyq «Qaırat» synǵa túsip jatyr. Qazaqstandyq komanda dop dodasynda barlyǵy 8 oıyn ótkizedi. Onyń 4-eýi óz alańynda bolsa, 4-eýi syrt alańǵa josparlanǵan.

Negizgi kezeńde barlyǵy 36 komanda synǵa túsedi. Birinshi týr bıyl 16 qyrkúıekte bastalsa, segizinshi týr 2026 jyldyń 28 qańtarynda bolady. Al pleı-off 16-18 aqpan, 1/8 fınal 10-11 naýryz, ¼ fınal 7-8 sáýir, ½ fınal 28-29 sáýir, fınal 30 mamyrǵa belgilengen.

Jarys erejesine sáıkes 1-8 oryn alǵan komandalar birden 1/8 fınalǵa joldama alady. Al 9-24 oryn alǵan klýbtar 1/16 fınalda synǵa túsip, jarystyń kelesi satysyna shyǵady. Qalǵan komandalar eýrododadaǵy jarys jolyn aıaqtaıdy.

Almatylyq fýtbolshylar atalǵan týrnırdiń alǵashqy úsh irikteý kezeńinde Slovenııanyń «Olımpııa» (1:1, 2:0), Fınlıandııanyń KýPS klýbtaryn (0:2, 3:0), Slovakııanyń «Slovan» (1:0, 0:1, penaltıden 4:3) komandasyn qapy qaldyryp ketti. Al pleı-off kezeńinde Shotlandııanyń «Seltık» komandasyn (0:0, 0:0, penaltıden 3:2) jeńip, negizgi kezeńge joldama alǵan edi.

Qazaqstandyq komanda elimizdiń atynan Chempıondar lıgasynyń jańartylǵan nusqasynda baq synaıtyn alǵashqy komanda atanyp otyr.

Qazirge deıin 2015/2016 jylǵy maýsymda elordalyq «Astana» komandasy Chempıondar lıgasy toptyq kezeńinde synǵa túsken edi.